ენერგო-პრო ჯორჯია აგრძელებს დავალიანების გადანაწილებას
სს ,,ენერგო-პრო ჯორჯიამ“ მარტში მომხმარებელთა უკლებლივ ყველა განაცხადი, გადასახადების განწილვადების ან გადავადების შესახებ, დააკმაყოფილა.
,,ამ რთულ პერიოდში ეს იყო ძალიან მნიშვნელოვანი თანამშრომლობა კომპანიასა და მის აბონენტებს შორის, რადგან ერთის მხრივ, კომპანიამ გაითვალისწინა მომხმარებელთა მძიმე მდგომარეობა და უარი თქვა გათიშვების წარმოებაზე, ხოლო მეორე მხრივ, აბონენტთა დიდმა ნაწილმა დროულად მოახდინა დავალიანების დაფარვა ან მოითხოვა გადახდის შეღავათიანი პირობები, აბონენტთა მხოლოდ მცირე ნაწილმა კი არ განახორციელა ანგარიშსწორება და არც დავალიანების განწილვადება მოითხოვა. მომდევნო თვეებში, მნიშვნელოვანი დახმარება იქნება საქართველოს მთავრობის მიერ განსაზღვრული სუბსიდირება, რომლის ფარგლებშიც 200 კილოვატსაათის ჩათვლით, მოხმარება სრულად აუნაზღაურდებათ აბონენტებს”, – აცხადებენ კომპანიაში. მათივე თქმით, გაგრძელდება მოსახლეობის მომართვების განხილვა და დავალიანების განწილვადების პირობებზე შეთანხმება. მომართვა შესაძლებელია კომპანიის ქოლ ცენტრის (0322471707) მეშვეობით.
კომპანია, განსაკუთრებულ მადლობას უხდის ყველა იმ თანამშრომელს, რომლებიც, მიუხედავად გაზრდილი რისკებისა, უწყვეტ რეჟიმში აგრძელებენ საქმიანობას და უზრუნველყოფენ სადისტრიბუციო ქსელის თუ ჰიდროელექტროსადგურების შეუფერხებელმუშაობას.
