სახლში დარჩი, მაგრამ… ნუ მოიწყენ!
ირმა ცეცხლაძე 27 48 93
არსებული მდგომარეობიდან გამომდინარე აჭარის ახალგაზრდობის რეგიონულმა ცენტრმა დაიწყო ახალი კამპანია „არ შეაჩერო განვითარება-შინ“, რომლის ფარგლებშიც უკვე ჩატარდა ორი ონლაინსემინარი თემებზე „პოზიტიურად აზროვნების ხელოვნება“ და „დროის ეფექტურად მართვა“. მასტერკლასებს უძღვებოდნენ ტრენერთა ასოციაციის პრეზიდენტი თამარ კანაშვილი და ქოუჩინგის საერთშორისო ფედერაციის საქართველოს წარმომადგენლობის ვიცეპრეზიდენტი რუსუდან კვაჭანტირაძე.
კამპანიის ძირითადი მიზანი შინ ყოფნის დროს პოზიტიური განწყობის შენარჩუნება, მუდმივი განვითარება და დროის ეფექტური მართვაა.
აჭარის ახალგაზრდობის ცენტრის საზოგადოებასთან ურთიერთობის სამსახურის უფროსმა თენგიზ დოლიძემ განაცხადა: – ახალგაზრდობის რეგიონული ცენტრი მუდმივად ზრუნავს აჭარის რეგიონში მცხოვრები ახალგაზრდების განვითარებაზე და აგრძელებს კამპანიას „არ შეაჩერო განვითარება – შინ“. ჩვენთვის მნიშნელოვანია, ამ პერიოდშიც კი დავგეგმოთ ისეთი ,,აქტივობები“, რომელთა მეშვეობითაც ახალგაზრდები დროს საინტერესოდ და ეფექტურად გაატარებენ.
მისივე თქმით, ამ კამპანიის ფარგლებში ჰქონდათ ბლოგების კონკურსი, სადაც ახალგაზრდებმა თავიანთი ყოველდღიურობა და თვითიზოლაციაში ყოფნის კრეატიული იდეები გაუზიარეს ერთმანეთს. – მათ მიერ მოწოდებულ ფოტოებში ნათლად ჩანს თავისუფალი დროის სწორად გამოყენების სხვადასხვა ვარიანტი. ამ კამპანიით ერთმანეთს ჩვენი ხედვები გავუზიარეთ, რადგან ასე დრო უფრო საინტერესოდ გადის. შემდეგ ვებინარს კომპანია ,,ალივე“-ის დამფუძნებელი ანდრო დგებუაძე ჩაატარებს. ახალგაზრდობის რეგიონული ცენტრი აკეთებს ყველაფერს იმისთვის, რომ ურთულესი მდგომარებაც კი საინტერესო და ნაყოფიერი გახადოს, – ამბობს თენგო დოლიძე
