სამივე ახალი შემთხვევა იმპორტირებულია
ნინო ცხვარაძე: 591 98 24 30
ბათუმში კოვიდ-19-ით ინფიცირებულთა რიცხვი 12-მდე გაიზარდა. აჭარის ჯანდაცვის მინისტრ ზაალ მიქელაძის განცხადებით, სამივე პაციენტი საკარანტინე ზონიდან გადაიყვანეს ცხელების კლინიკაში.
-30-დან 50 წლამდე ასაკის 3 პაციენტიდან ერთი ლონდონის რეისიდანაა, დანარჩენი ორი კი თურქეთიდანაა გადმოსული. სამივე ახალი შემთხვევა იმპორტირებულია. ორი პაციენტის მდგომარეობა მსუბუქია, ერთს კი ორმხრივი პნევმინია აქვს, – გვითხრა ზაალ მიქელაძემ. მისივე თქმით, აჭარაში საკარანტინე სივრცეში 2000-ზე მეტი ადამიანი რჩება, 1200-მა კი საკარანტინე ზონა დატოვა.
-ადამიანები, რომლებიც ქვეყანაში შემოვლენ, გადავლენ საკარანტინე ზონაში. დღეში, დაახლოებით, 100-ზე მეტი ადამიანი შემოდის თურქეთიდან, – გვითხრა ზაალ მიქელაძემ. მინისტრის განცხადებით, შესაძლოა, ამ დღეებში 3-მა პაციენტმა დატოვოს “მედალფას” კლინიკა.
-სამი პაციენტის ანალიზი კორონავირუსზე უარყოფითია. მათ დღეს განმეორებით კვლევას ჩაუტარებენ და სავარაუდოდ, ხვალ კლინიკას დატოვებენ, – გვითხრა მინისტრმა. მისივე განცხადებით, ერთი პაციენტი ისევ რჩება მართვით სუნთქვაზე, თუმცა დინამიკა უარყოფითისკენ არ იცვლება. პაციენტი სტაბილურად მძიმეა, მაგრამ არა კრიტიკული.
