აჭარაში კორონავირუსის 6 ახალი შემთხვევა დადასტურდა
მარიამ ხითარიშვილი 27 48 93
ქობულეთის კლასტერთან კონტაქტში მყოფ 6 პირს კორონავირუსი დაუდასტურდა. არსებული ინფორმაციით, აღნიშნული ჯგუფიდან დღეს 40 პირია მოძიებული. მიმდინარეობს ეპიდემიოლოგიური კვლევა როგორც ქობულეთის რამდენიმე სოფელში, ასევე, ქალაქის ტერიტორიაზეც. აჭარის ჯანდაცვის მინისტრის მოადგილე ნინო ნიჟარაძე არ გამორიცხავს, რომ კოვიდ-19-ის შემთხვევების რაოდენობა გაიზარდოს.
–მოგეხსენებათ, გუშინ დაგვემატა ორი ახალი შემთხვევა საკარანტინე სივრციდან, დედა–შვილი, ორივე გადაყვანილია თბილისის კლინიკაში რამდენიმე ფაქტორის გათვალისწინებით, მათ შორის, მათი სურვილით. ისინი არ არიან აჭარის მცხოვრებლები. რაც შეეხება დღევანდელ ინფორმაციას, დამატებით მოვიძიეთ ქობულეთის კლასტერთან დაკავშირებული 40 კონტაქტირებული პირი. ესენი გახლავთ დაავადებულთან კონტაქტში მყოფი პირები, ოჯახური და სხვა კონტაქტები, არა – სამედიცინო პერსონალი. მათგან აღებულია ეპიდემიოლოგიური კვლევის 8 ნიმუში, რომლებიდანაც 6 დადასტურდა. აქედან ერთი არასრულწლოვანია, დანარჩენები სხვადასხვა ასაკობრივი ჯგუფიდან არიან. საუბარია ქობულეთის მუნიციპალიტეტის რამდენიმე სოფელზე. მიმდინარეობს ყველა კონტაქტირებული პირის მოძიება. ბოლო ორი დღის შეჯამებით, გვყავს 148 კონტაქტირებული პირი და ეს პროცესი არ დასრულებულა, რადგან ჩვენ ვმუშაობთ არა მხოლოდ პირველი ინფიცირებული პირის, არამედ ყველა დადასტურებული შემთხვევის კონტაქტურ პირებებზე. კონტაქტირებულ პირთა რაოდენობა შესაძლოა კიდევ გაიზარდოს. გაიზრდება ლაბორატორიული კვლევის ნიმუშების რაოდენობაც უკვე თვითიზოლაციაში ან კარანტინში მყოფი პირებიდან, ახალი შემთხვევებიდან და ა.შ. დღეს გამოვლენილი ინფიცირებული პირები ბათუმის კლინიკა „მედალფაში“გადმოჰყავთ. ამ ეტაპზე, კლინიკაში გვყავს 14 ძველი და 2 ახალი დადასტურებული შემთხვევა. „მედალფაში“ მყოფი პაციენტებიდან ერთის მდგომარეობა სტაბილურად მძიმეა, ერთი ახალშეყვანილი პაციენტი საყურადღებოა, დანარჩენების მდგომარეობა მსუბუქი და საშუალო სიმძიმისაა. ველოდებით ერთი პაციენტის განკურნებას და მეორადი საკონტროლო კვლევის ანალიზს. საბოლოო შედეგი ხვალ დილისთვის გვეცოდინება. ამ ეტაპზე, აჭარაში 20 დადასტურებული შემთხვევა გვაქვს, რომელთაგან 16 კლინიკაში იმყოფება, 4 კი ქობულეთიდან გადმოჰყავთ. ასევე, სარფის საბაჟოზე იმყოფება ერთი პირი, რომელიც, სავარაუდოდ, ინფიცირებულთა რიცხვს დაემატება, – გვითხრა აჭარის ჯანმრთელობისა და სოციალური დაცვის მინისტრის მოადგილე ნინო ნიჟარაძემ.
