ბათუმის ერთ-ერთ საკარანტინო სივრცეში 45 მოქალაქე მოიწამლა
მარიამ ხითარიშვილი: 27 48 93
ორი დღის წინ ბათუმის ერთ-ერთ სასტუმროში, საკარანტინო სივრცეში, საკვებით 45 ადამიანი მოიწამლა. მათგან ორს კლინიკაში გადაყვანა დასჭირდა, სადაც სამედიცინო დახმარება გაეწია. ამ პირებს ანალიზები კორონავირუსზეც აუღეს. აჭარის ჯანმრთელობისა და სოციალური დაცვის მინისტრის მოადგილის ნინო ნიჟარაძის განცხადებით, არცერთ მათგანს კორონავირუსი არ დაუდასტურდა. კარანტინში მყოფებმა მკურნალობის კურსი გაიარეს. ნაწილმა სასტუმრო დღეს დატოვა, სხვებს კი საკარანტინო სივრციდან ხვალ გაუშვებენ.
–ერთ-ერთ საკარანტინო სივრცეში საკვებისმიერი ინტოქსიკაციის შემთხვევა დაფიქსირდა. ეს იყო ორი დღის წინ. 45 დაავადებული პირი აღირიცხა, რომელთაგან ორი შედარებით საყურადღებო იყო და ისინი კლინიკა „მედ ემერჯენსში“ გადაიყვანეს. ერთდღიანი მკურნალობის შემდეგ ისევ დაუბრუნდნენ საკარანტინო სივრცეს. დანარჩენის მდგომარეობა საშუალო და მსუბუქი სიმძიმის იყო. ყველას შესაბამისი დანიშნულება მისცეს. გუშინ (კარანტინის მე-14 დღეს) ჩაუტარდათ ტესტირება და დღეს 49 პირმა დატოვა საკარანტინო სივრცე. მათ შორის იყვნენ როგორც საკვებისმიერი ინტოქსიკაციით დაავადებული პირები, ასევე სხვა მოქალაქეები. ინტოქსიკაციის მქონე პირების ნაწილი ხვალ დატოვებს საკარანტინო სივრცეს, ვინაიდან ნაწილს 21 აპრილს გაუკეთებენ ტესტირებას, – განაცხადა ნინო ნიჟარაძემ.
