ბათუმში 90 გამოკვლეული პაციენტიდან კოვიდ-19 არცერთს არ დაუდასტურდა
მარიამ ხითარიშვილი 27 48 93
ბათუმში გუშინ, ღამით გამოკვლეული 90 პაციენტიდან კორონავირუსი არცერთს არ დაუდასტურდა. დღის განმავლობაში კიდევ 50 პაციენტის ტესტირების პასუხს ელოდებიან. აჭარის ჯანდაცის სამინისტროში აცხადებენ, რომ რეგიონში ამ ეტაპზე სიტუაცია სტაბილური და მშვიდია, თუმცა ეს არ ნიშნავს, რომ მომდევნო დღეებში შემთხვევების მატება არ იქნება. უწყება მოუწოდებს მოსახლებას, მკაცრად დაიცვან რეკომენდაციები.
კლინიკა „მედალფაში“ 35 ახალი კორონავირუსით ინფიცირებული მკურნალობს, მათგან ერთის მდგომარეობა რჩება კრიტიკულად მძიმე. აჭარში შემთხვევების უმრავლესობა ქობულეთს უკავშირდება, კლასტერი ითვლის 34 ინფიცირებულსა და 520 კონტაქტს, ასევე, ერთ გარდაცვლილს. აჭარაში ჯამში 1 900-მდე პირია გამოკვლეული, 13 პაციენტი კი გამოჯანმრთელდა.
როგორც აჭარის ჯანმრთელობისა და სოციალური დაცვის მინისტრის მოადგილე ნინო ნიჟარაძემ განაცხადა, მომავალი ორი კვირა იქნება კრიტიკული. სავარაუდოდ, მოიმატებს ვირუსით ინფიცირებულთა შემთხვევები.
– დღეის მონაცემებით, აჭარაში 90 საეჭვო ანალიზიდან ყველა პასუხი კოვიდ-19-ზე უარყოფითია. ბათუმის ცხელების კლინიკაში 35 პირი მკურნალობს, აქედან 34 ქობულეთის კლასტერიდანაა. მათი ჯანმრთელობის მდგომარეობა დამაკმაყოფილებელია. კლასტერთან კონტაქტირებული პირების სია 520-მდე გაიზარდა. მათ უტარდებათ ლაბორატორიული დიაგნოსტიკა. დღეს ასევე ცნობილი გახდება იმ 50 პირის პასუხი, რომლებსაც ტესტირება გუშინ ჩაუტარდათ. ქობულეთის კლასტერის პირველ ინდექს პაციენტთან კონტაქტირებული პირებისთვის საკარანტინო პერიოდი სრულდება, ამიტომ რამდენიმეს დღეს განმეორებით ჩაუტარდება დიაგნოსტიკა და თუ პასუხები უარყოფითი იქნება, მათი თვითიზოლაციის პერიოდი დასრულებულად ჩაითვლება. მძიმედ რჩება ერთი პაციენტი, რომელიც ამ დრომდე მართვით სუნთქვაზე იმყოფება. ბათუმის ქუჩებში ბოლო დღეებში იყო თავშეყრის შემთხვევები, ამიტომ მოსახლეობას კიდევ ერთხელ ვთხოვთ, თავი შეიკავონ თავყრილობებისგან, ჯგუფებად გადაადგილებისგან. თუ საჭიროება არ მოითხოვს, ნუ გამოვალთ სახლებიდან. ამ ეტაპზე ვართ სიმშვიდის ფაზაში, რადგან ყველა შემთხვევა კონტროლირებადია, თუმცა შემდეგი ორი კვირა იქნება ძალიან კრიტიკული, ეს ყველამ უნდა გავითვალისწინოთ, – განაცხადა ნინო ნიჟარაძემ.
საქართველოში კორონავირუსი 408 ადამიანს დაუდასტურდა, აქედან 95 უკვე გამოჯანმრთელდა, 4 კი გარდაიცვალა.
