პირველკლასელთა რეგისტრაციის ახალი ვადები
ნანა აბულაძე: 577203590
საქართველოს განათლების, მეცნიერების, კულტურისა და სპორტის სამინისტროს განცხადებით, ქვეყნის მასშტაბით გამოცხადებული საგანგებო მდგომარეობისა და მშობლების ინტერესების გათვალისწინებით, 2020-2021 სასწავლო წლისთვის, პირველკლასელთა რეგისტრაციის ახალი ვადები გაიწერა. მაგალითად, სპეციალური საგანმანათლებლო საჭიროების მქონე მოსწავლეებისათვის დოკუმენტის წარდგენის საბოლოო ვადად 24 აპრილის ნაცვლად, 5 ივლისი განისაზღვრა. მინისტრის ბრძანების თანახმად, მოსწავლეების ჩარიცხვა მულტიდისციპლინური გუნდის დასკვნისა და სპეციალური საგანმანათლებლო საჭიროების მქონე მოსწავლის სტატუსის მინიჭების გარეშე განხორციელდება.
რაც შეეხება პირველკლასელთა რეგისტრაციის მეორე ეტაპს, ამ შემთხვევაში იცვლება როგორც რეგისტრაციის, ასევე დოკუმენტების წარდგენის თარიღი. რეგისტრაციის ორი ეტაპი განხორციელდება 11 მაისიდან, 1 ივნისის ჩათვლით, დოკუმენტების წარდგენა კი 11 მაისიდან, 5 ივლისის ჩათვლით იქნება შესაძლებელი.
სამინისტროს განმარტებით, ამ ეტაპზე სკოლაში დარეგისტრირდებიან ბავშვები, რომელთა და-ძმა სწავლობს სასურველ სკოლაში, მშობელი არის კონკრეტული სკოლის თანამშრომელი, ოჯახიდან ორი ან მეტი ბავშვი შედის პირველ კლასში.
რაც შეეხება რეგისტრაციის მესამე ეტაპს, აქ იცვლება რეგისტრაციისა და დოკუმენტების წარდგენის ვადები. საყოველთაო რეგისტრაცია 2 ივნისს დაიწყება და 25 ივნისის ჩათვლით გაგრძელდება. დოკუმენტაციის წარდგენა კი 2 ივნისიდან, 5 ივლისის ჩათვლით გაგრძელდება.
რეგისტრაცია განათლების მართვის საინფორმაციო სისტემის ოფიციალურ ვებგვერდზე 
განხორციელდება. ელექტრონულ რეგისტრაციას მშობელი ან კანონიერი წარმომადგენელი უზრუნველყოფს. რაც შეეხება რეგისტრაციის ბოლო, ანუ მეოთხე ეტაპს, პირველკლასელთა რეგისტრაცია და დოკუმენტაციის წარდგენა 20 აგვისტოს დაიწყება და 10 სექტემბრის ჩათვლით გაგრძელდება.
აღსანიშნავია, რომ ვინც პირველ და მეორე ეტაპზე ვერ დარეგისტრირდება, მათ დაარეგისტრირებენ გამოთავისუფლებულ, ვაკანტურ ან თავისუფალ ადგილებზე.
მშობლებს შეეძლებათ ელექტრონულად გადააგზავნონ განცხადებები თანდართულ დოკუმენტთან ერთად, ან უსაფრთხოების ნორმების დაცვით ჩააბარონ სკოლის ადმინისტრაციას, რის შემდეგაც კანონმდებლობით დადგენილ ვადებში სკოლა დაადასტურებს მოსწავლის ჩარიცხვას.
