საგანმანათლებლო პროგრამა გარემოსდაცვით გამოწვევებზე
ნანა აბულაძე: 577 20 35 90
საქართველოს განათლების, მეცნიერების, კულტურისა და სპორტის სამინისტროსა და კავკასიის გარემოსდაცვითი არასამთავრობო ორგანიზაციების ქსელს შორის დადებული ურთიერთთანამშრომლობის მემორანდუმის თანახმად, საქართველოში საერთაშორისო გარემოსდაცვითი სამეცნიერო-საგანმანათლებლო პროგრამა GLOBE დაინერგება. აღნიშნული პროგრამის პილოტირება ჯერ 5 სკოლაში დაიწყება, ხოლო 2020-2021 სასწავლო წლისთვის 10 სკოლა გადამზადდება პროგრამაში ჩასართავად. როგორც განათლების სამინისტროში განმარტავენ, პროგრამა GLOBE საინტერესო თემებს მოიცავს, რომლის ცოდნაც მნიშვნელოვანია მათთვის, ვისაც ხარისხიანი განათლების სურვილი აქვს. აღსანიშნავია ისიც, რომ პროგრამას გლობალურ დონეზე ნასა ახორციელებს და ის სხვადასხვა სასკოლო საფეხურის მოსწავლეებს, მასწავლებლებსა და მეცნიერებს გლობალური გარემოს შესასწავლად აერთიანებს. პროგრამა ეკოლოგიურ კვლევებს და დაკვირვებებს ითვალისწინებს. მასში საქართველოდანაც ჩაერთვებიან და გლობალური თუ ადგილობრივი გარემოსდაცვითი გამოწვევებისა და მათი გადაჭრის გზებზე ფართო საზოგადოებას მიაწოდებენ ინფორმაციას.
