ფიზიკურ პირებთან დასაქმებული მოქალაქეები დახმარებას ვერ მიიღებენ
ნანა აბულაძე: 577 20 35 90 –
სახელმწიფოსგან მიიღებენ თუ ვერა ფულად დახმარებას ფიზიკურ პირებთან მომუშავე ადამიანები – აღნიშნული თემა მსჯელობის საგანი გახდა საზოგადოებაში. როგორც საქართველოს ჯანდაცვის მინისტრის მოადგილე თამარ ბარკალაიამ განაცხადა, სამწუხაროდ, ფიზიკურ პირებთან დასაქმებული ადამიანები, მაგალითად, ძიძები, მძღოლები და ა. შ. დახმარებას ვერ მიიღებენ. მისივე განცხადებით, ფიზიკური პირისგან დადასტურება არ იქნება საკმარისი იმისათვის, რომ მოქალაქეს სახელმწიფომ თანხა გადაუხადოს. როგორც თამარ ბარკალაიამ განმარტა, ცნობა იურიდიული პირის მიერ უნდა იყოს გაცემული. თუ ადამიანი ტაქსის მძღოლი იყო, ლიცენზია იქნება საკმარისი, თუმცა, თუ ის მძღოლად მუშაობდა ოჯახში, ოჯახის წერილი არ იქნება საკმარისი.
შეგახსენებთ, რომ 24 აპრილს საქართველოს მთავრობამ საზოგადოებას ანტიკრიზისული გეგმა წარუდგინა, სადაც პრემიერ-მინისტრმა გიორგი გახარიამ დეტალურად ისაუბრა იმ ნაბიჯებზე, რომლებსაც ხელისუფლება გადადგამს ქვეყანაში შემოღებული შეზღუდვების ეტაპობრივად მოხსნისთვის. პრემიერის განცხადებით, მართალია კრიზისული მდგომარეობაა ქვეყანაში, მაგრამ ხელისუფლება ადამიანებს არ გაარჩევს და დაეხმარება, რაც, მისივე განცხადებით, არ იქნება მარტივად გასაკეთებელი .
