უეფა საქართველოს ფეხბურთის ფედერაციას 4, 3 მილიონ ევროს ჩაურიცხავს
ნანა აბულაძე: 577203590 –
სასიამოვნო ინფორმაცია სპორტის სფეროს გულშემატკივრებისათვის – საქართველოს ფეხბურთის ფედერაცია უეფას აღმასრულებელი კომიტეტისგან 4, 3 მილიონ ევროს მიიღებს. როგორც ცნობილია, უეფას აღმასრულებელმა კომიტეტმა შეცვალა დადგენილი წესები და გადაწყვიტა, პროგრამა „ჰეთ თრიკში“ ჩართულ ქვეყნებს თანხა წინასწარ ჩაურიცხოს, მათ შორის საქართველოს. როგორც ევროპული ფეხბურთის მმართველი ორგანოს ოფიციალურ ვებსაიტზე ვკითხულობთ, სულ საუბარია 236,5 მილიონ ევროზე, რომელიც უეფას წევრ 55 ასოციაციაზე გადანაწილდება. აღნიშნული პროგრამა უეფამ 2004 წელს ჩამოაყალიბა, რომლის მიზანიც ევროპაში ფეხბურთის განვითარება,ასევე, სპორტული და ადმინისტრაციული ინფრასტრუქტურის გაუმჯობესებაა. ის, რომ საქართველო “ჰეთ-თრიკის” პროგრამის ფარგლებში 2020-2024 წლებში სულ 14, 1 მილიონ ევროს მიიღებდა, ბრატისლავაში 2018 წელს გამართულ უეფას 42-ე კონგრესზე გადაწყდა: – კრიზისი, რომელსაც მსოფლიო ებრძვის, როგორც სხვა მიმართულებებისთვის, ფეხბურთისთვისაც ძალიან დიდი პრობლემაა. შესაბამისად, უეფას სურს, თავის წევრ ასოციაციებს მაქსიმალურად შეუწყოს ხელი, რათა ისინი ღირსეულად გაუმკლავდნენ ამ გამოწვევას. გადავწყვიტეთ, თითოეულ ასოციაციას წინასწარ მივცეთ მიმდინარე სეზონის დარჩენილი ნაწილისა და მომავალი სეზონის დაფინანსება – 4,3 მილიონი ევრო. თანხის ნაწილს უეფას წევრები საფეხბურთო მეურნეობის აღსადგენად თავიანთი შეხედულებისამებრ გამოიყენებენ, – განაცხადა უეფას პრეზიდენტმა ალექსანდრე ჩეფერინმა.
