აბიტურიენტთა საყურადღებოდ!
ნანა აბულაძე: 577 20 35 90 –
39 300-ზე მეტი აბიტურიენტი, 3 600-ზე მეტი სტუდენტი, 12 600-ზე მეტი მაგისტრობის კანდიდატი, 19 600-ზე მეტი მასწავლებელი და მასწავლებლობის მსურველი – ასეთია ერთიანი ეროვნული და საერთო სამაგისტრო გამოცდების ჩაბარების მსურველთა, ასევე მასწავლებელთა კომპეტენციის დადასტურებისა და სტუდენტთა საგრანტო კონკურსში დარეგისტრირებულთა რაოდენობა. როგორც ცნობილია, ქვეყანაში შექმნილი მდგომარეობის გამო და გამოცდებში მონაწილეობის მსურველთა ინტერესების გათვალისწინებით, საქართველოს განათლების, მეცნიერების, კულტურისა და სპორტის სამინისტრომ შეფასებისა და გამოცდების ეროვნულ ცენტრთან ერთად გამოცდებზე რეგისტრაციის ვადა 30 მარტიდან 30 აპრილის 18:00 საათამდე გადაწია. როგორც სამინისტროში აცხადებენ, არ განიხილება ერთიანი ეროვნული გამოცდების ჩატარების ვადებში ცვლილება, ანუ გამოცდები ივლისში ჩატარდება და მისი ზუსტი თარიღები ივნისში განისაზღვრება.
როგორც უწყებაში განმარტავენ, ისინი ყოველდღიურად გადიან კონსულტაციებს ჯანდაცვის სფეროს წარმომადგენლებთან, რათა საგამოცდო პროცესი უსაფრთხოდ და ყველა ნორმის დაცვით, ეპიდსიტუაციისა და რეკომენდაციების სრული გათვალისწინებით ჩატარდეს. უწყების განცხადებით, მათი უპირველესი ამოცანაა, მაქსიმალურად დაიცვან გამოცდებში მონაწილეთა ჯანმრთელობა და უსაფრთხოება, ასევე სრულყოფილად წარმართონ საგამოცდო პროცესი.
განათლების სამინისტრო აბიტურიენტთა საყურადღებოდ ასევე, ავრცელებს განცხადებას, სადაც ვკითხულობთ, რომ ერთიანი ეროვნული გამოცდების მონაწილეთა რეგისტრაცია წელსაც რამდენიმე ეტაპად ჩატარდება. შესაბამისად, ჩასაბარებელი საგნის შეცვლა (წაშლა, დამატება), გამოცდის ენის შეცვლა ან კონკურსის (შემოქმედებითი ტურის) არჩევა აბიტურიენტებს 2020 წლის 7 მაისის 18:00 საათამდე შეეძლებათ, საგანმანათლებლო პროგრამების შეცვლისა და დამატების შესაძლებლობა კი აპელაციების შედეგების გამოქვეყნებიდან მომდევნო დღის ჩათვლით.
