ბათუმში, შესაძლოა, ორი პოლიკლინიკა საყოველთაო ჯანდაცვის პროგრამას გამოეთიშოს
ხატია იაშვილი: 591 98 24 26 –
დღეიდან, საქართველოს მასშტაბით, იმ პოლიკლინიკებსა და ამბულატორიებს, რომლებსაც 13 ათასზე ნაკლები ბენეფიციარი ჰყავთ, სახელმწიფო დაფინანსება შეუწყდებათ, ასეთი კი სულ 56 ობიექტია.
გადაწყდა, რომ სახელმწიფო პროგრამაში თბილისის მასშტაბით 117, ხოლო ქუთაისსა და ბათუმში 20 პოლიკლინიკა და ამბულატორია დარჩება. პირველადი ჯანდაცვის საბჭოს დადგენილებაში გარკვეული ცვლილებაც შევიდა. მოსახლეობის რაოდენობასთან ერთად, გეოგრაფიული მდებარეობის გათვალისწინებით, გამონაკლისის სახით, პროგრამაში დარჩა რამდენიმე ობიექტი, რომელსაც აღრიცხვაზე მხოლოდ 7 ათასი ბენეფიციარი ჰყავს.
ახალი რეგულაციების შემდეგ ბათუმში, შესაძლოა, ორი დაწესებულება “ენმედიცი” და “ბათუმის ენდოკრინოლოგიურ ცენტრი ” გამოეთიშოს საყოველთაო ჯანდაცვის პროგრამას. აჭარის ჯანდაცვის სამინისტროში ამბობენ, რომ სხვა დაწესებულებები, რომლებსაც ჰყავთ 13 000-ზე ნაკლები ბენეფიციარი, წინასწარი ინფორმაციით, მომსახურების მიწოდებას გააგრძელებენ.
-გუშინ გაიმართა პირველადი ჯანდაცვის საბჭოს შეხვედრა, სადაც განვიხილეთ პოლიკლინიკების ჩამონათვალი. გამოიყო რამდენიმე კრიტერიუმი, რომლის მიხედვითაც მათთვის უპირატესობის მინიჭება იყო მნიშვნელოვანი. ეს კრიტერიუმი იყო გეოგრაფიული მდებარეობა, ასევე, ბენეფიციართა რაოდენობა 13000-მდე, თუმცა 7000-ზე მეტი. ეს არის ის რაოდენობა, რომელიც სოლიდურ რაოდენობადაა მიჩნეული და რომელთა გადანაწილებას სხვა პოლიკლინიკებისათვის შეიძლებოდა პრობლემები შეექმნა. მიმდინარეობს ამ საკითხის განხილვა. ბათუმში ასეთი გვაქვს სამი პოლიკლინიკა. მახინჯაურის პოლიკლინიკა, გეოგრაფიული მდებარეობის გათვალისწინებით, დარჩება საყოველთაო ჯანდაცვის პროგრამაში, ასევე, გვაქვს მეზღვაურთა სამედიცინო ცენტრი და საზღვაო ჰოსპიტალი, რომლებიც სავარაუდოდ გააგრძელებენ ფუნქციონირებას. მათი ბენეფიციარები 7000-ზე მეტია. საბოლოო გადაწყვეტილება ცნობილი იქნება მომავალი კვირის სამშაბათს.
პრობლემატური პოლიკლინიკების საყოველთაო ჯანდაცვის პროგრამიდან გამოთიშვის შემთხვევაში, ბენეფიციარები გადანაწილდებიან გეოგრაფიული ლოკაციების მიხედვით, თუმცა პაციენტს პოლიკლინიკის შეცვლის უფლება სურვილის მიხედვით შეეძლება. სამედიცინო პერსონალის დეფიციტია ისედაც, როგორც ოჯახის ექიმებში, ისე ექთნებში, და ისინი უმუშევრად არ დარჩებიან, – განაცხადა აჭარის ჯანმრთელობისა და სოციალური დაცვის მინისტრის მოადგილე ნინო ნიჟარაძემ.
