საბავშვო ბაღებში სასურსათო კალათის დარიგების მეორე ეტაპი 6 მაისს დაიწყება
ხატია იაშვილი: 591 98 24 26 –
10 ცალი კვერცხი, 1 ლიტრი რძე, 0,2 კგ კარაქი, 1 კგ მაკარონი, 1 კგ შაქარი, 1 კგ ხმელი ბარდა, 1 კგ ხორბლის ფქვილი, 1 ლიტრი ზეთი , 0,8 კგ ბრინჯი და 0.5 კგ შვრია – ესაა იმ სასურსათო კალათის ჩამონათვალი, რომელსაც ბათუმის მერია 6 მაისიდან საბავშვო ბაღების აღსაზრდელებზე გასცემს. საბავშვო ბაღების აღსაზრდელების მშობლები სასურსათო პროდუქტების მიღებას იმ ადმინისტრაციულ უბნებში შეძლებენ, სადაც მათი შვილების სკოლამდელი აღზრდის დაწესებულებაა განთავსებული.
ბათუმის ბაღების გაერთიანებაში აცხადებენ, რომ პროდუქტის გაცემა 6 მაისს დაიწყება და სამი დღის განმავლობაში 10:00 სთ-დან 16:00 სთ-მდე გაგრძელდება. კუთვნილი პროდუქტის მისაღებად საბავშვო ბაღში უნდა გამოცხადდეს მშობელი (დედა ან მამა). უწყების განმარტებით, პროცედურა სწრაფი და მარტივია – 1-2 წუთი სჭირდება. მშობელი შედის ბაღის ფოიეში, ხელს აწერს უწყისში თავისი გვარის გასწვრივ, იღებს კუთვნილ ფუთას და დისტანციის დაცვით გადის შენობიდან.
ბათუმის საბავშვო ბაღების გაერთიანება მოუწოდებს მშობლებს, დაიცვან ახალი კორონავირუსის გავრცელების პრევენციისათვის დადგენილი უსაფრთხოების წესები და დაემორჩილონ საბავშვო ბაღის მიერ შემუშავებულ ინსტრუქციებს.
