რეგისტრირებული 90 აგრარული ბაზრიდან 64 უკვე გაიხსნა
ნანა აბულაძე:577 20 35 90 –
როგორც სურსათის ეროვნული სააგენტოს მიერ მოწოდებულ ინფორმაციაში ვკითხულობთ, საქართველოში რეგისტრირებული 90 აგრარული ბაზრიდან 64 უკვე გაიხსნა. ყველა რეგიონში ფუნქციონირებს საკვანძო ადგილებში არსებული აგრარული ბაზრები. რაც შეეხება დარჩენილი ბაზრების უმეტესობას, სააგენტოს ინფორმაციით, სეზონურია და შესაბამის პერიოდში განაახლებს საქმიანობას.
სააგენტოსვე ცნობით, ყველა გახსნილი აგრარული ბაზრის ადმინისტრაციამ სურსათის ეროვნული სააგენტოს რეკომენდაციები გაითვალისწინა და ისე მიიღო თანხმობა მუშაობის დაწყებაზე. მოხდა ძველი დახლების დემონტაჟი და ნარჩენების გატანა, დამონტაჟდა დეზობარიერები და ყოველდღიურად ტარდება სადეზინფექციო სამუშაოები, კონტროლდება პერსონალის და მომხმარებლის დამცავი საშუალებებით აღჭურვა და სოციალური დისტანციის დაცვა. სააგენტოს ინსპექტორები მუდმივ რეჟიმში ახორციელებენ მონიტორინგს.
