ახალი პროექტი ქართული სპორტის ისტორიის პოპულარიზაციისთვის
ნანა აბულაძე: 577 20 35 90 –
„გაავრცელე ქართული სპორტის ისტორია” – ასე ჰქვია ონლაინ შემეცნებით პროექტს, რომელიც სასკოლო სპორტული ოლიმპიადის ფარგლებში, საქართველოს განათლების, მეცნიერების, კულტურისა და სპორტის სამინისტროს მხარდაჭერით დაიწყო. მისი მიზანია, ხელი შეუწყოს ქართული სპორტის პოპულარიზაციას, ასევე, მოზარდებში საქართველოს სპორტის ისტორიის ცოდნის გაღრმავებას და სახლის პირობებში, ფიზიკურ აქტივობასთან ერთად, სკოლის მოსწავლეებისა და პედაგოგების შემეცნებით აქტივობაში ჩართვას. სამინისტროს ინფორმაციით, პროექტში ჩართვა ნებისმიერ მოსწავლესა თუ მასწავლებელს შეეძლება, წესები კი ასეთია: უნდა ჩაწეროთ ვიდეო, წარადგინოთ თავი – ვინ ხართ, სად სწავლობთ, რომელ სკოლას წარმოადგენთ, უნდა ისაუბროთ თქვენს საყვარელ სპორტულ მოვლენაზე, სპორტსმენზე ან გუნდზე, საუბარი უნდა გაამდიდროთ ვიდეო ან ფოტოკადრებით. უნდა გამოიწვიოთ მეგობარი ან მეგობრები და ვიდეომიმართვა დაასრულოთ შემდეგი სიტყვებით: „გაავრცელე ქართული სპორტის ისტორია“. დაინტერესებულმა პირებმა ვიდეო სოციალურ ქსელში, საჯაროდ უნდა გაავრცელონ საკუთარ გვერდზე და უნდა მონიშნონ სასკოლო სპორტული ოლიმპიადის ფეისბუქის გვერდი. ასევე, არ უნდა დაგავიწყდეთ ჰეშთეგი: #გაავრცელექართულისპორტისისტორია.
