სტომატოლოგიური მომსახურების საფასური შესაძლოა გაიზარდოს
ხატია იაშვილი 591 98 24 26 –
22 მაისიდან გეგმური სტომატოლოგიური მომსახურება აღდგება. ამის შესახებ ინფორმაციას საქართველოს სტომატოლოგთა ასოციაცია ავრცელებს. ასოციაციის პრეზიდენტ ქეთევან გოგილაშვილის განაცხადებით, შესაძლოა, სტომატოლოგიური მომსახურების საფასური გაიზარდოს. მისივე თქმით, კლინიკებმა მუშაობა რომ განაახლონ, საჭიროა ინდივიდუალური დაცვის საშუალებების მარაგი, რისი ღირებულებაც გაძვირებულია.
„იმისათვის, რომ სტომატოლოგიურმა კლინიკამ განაახლოს მუშაობა, ერთ-ერთი მთავარი პუნქტია, რომ ჰქონდეს, მაგალითად, ინდივიდუალური დაცვის საშუალებების ორი კვირის მარაგი. მისი ფასი კი 100 პროცენტით კი არა, 400-ით არის გაზრდილი. ეს ფასი მხოლოდ ჩვენი კი არა, მსოფლიო პრობლემაა. აქედან გამომდინარე, მაგალითად, ერთი პაროდონტოლოგიური პაციენტის მიღების დროს, საშუალოდ, 50 ლარამდე იზრდება მხოლოდ ეკიპირების ფასი“, – აცხადებს ქეთევან გოგილაშვილი.
ასოციაციის პრეზიდენტის თქმით, დღესდღეობით ერთიანი მიღებული ფასი, რომლითაც ყველა კლინიკა მუშაობს, არ არსებობს.
„ზოგი – მაღალი, ზოგი – საშუალო, ზოგი დაბალი ფასებით მუშაობს, მაგრამ იგივე ფასითაც რომ დატოვო ყველაფერი, მხოლოდ ეკიპირება აძვირებს მომსახურების ღირებულებას. ჩვენ ვაპირებთ, განცხადებით მივმართოთ ჯანდაცვის სამინისტროს. არ ვიცი, პასუხი როგორი იქნება, მაგრამ იმედი მაქვს, რომ ჩინეთიდან ჩამოსული დიდი რაოდენობის ინდივიდუალური დაცვის საშუალებებიდან რაღაც სტომატოლოგიურ დაწესებულებებსაც გადაეცემა“, – ამბობს ასოციაციაციის პრეზიდენტი.
აღსანიშნავია ის ფაქტი, რომ ქვეყანაში შექმნილი ეპიდსიტუაციის გათვალისწინებით, შემუშავდა გარკვეული მოთხოვნები გეგმური სტომატოლოგიური მომსახურების აღდგენასთან დაკავშირებით. სამედიცინო და ფარმაცევტული საქმიანობის რეგულირების სააგენტომ შეიმუშავა სპეციალური განაცხადის ფორმა და ის მოთხოვნები, რომლებსაც უნდა აკმაყოფილებდეს სტომატოლოგიური დაწესებულებები.
სტომატოლოგიურმა კლინიკებმა უნდა შეავსონ განაცხადი და გადაგზავნონ ელექტრონული ფოსტის მისამართზე –
რეგულირების სააგენტოსა და შრომის პირობების ინსპექტირების დეპარტამენტის წარმომადგენლები შემოსული განცხადებების საფუძველზე დაიწყებენ სტომატოლოგიური კლინიკების მონიტორინგს.
