,,გაამწვანე შენი უბანი”
ხატია იაშვილი: 555 18 48 88 –
დღეს პოლიტიკური გაერთიანება „ლელო საქართველოსთვის” ბათუმის ორგანიზაციის წევრებმა ჩვენს ქალაქში მარადმწვანე წიწვოვანი და ფოთლოვანი ხეები დარგეს. აქცია საქართველოს რამდენიმე ქალაქში უკვე მიმდინარეობს. მისი მიზანი საცხოვრებელ უბნებში მეტი რეკრეაციული ზონის შექმნაა.
ორგანიზაციის წევრების თქმით, შეივსება ის ადგილები, რომელიც გასულ წელს ახლადრეაბილიტირებულ ქუჩებზე სპეციალურად, ახალი ნარგავებისთვის მოინიშნა და თვითმმართველი ქალაქ ბათუმის მერიამ ხეების დარგვა ამ დრომდე ვერ უზრუნველყო.
„ბოლო ათწლეულია, ბათუმი ურბანული კატასტროფის წინაშეა, ვხედავთ როგორ ქაოსურად ვითარდება ქალაქი, არ არსებობს განვითარების გენერალური გეგმა, დაუცველია მწვანე საფარი და ის დღითი დღე მცირდება, რის შედეგადაც ყოველდღიურად უარესდება მოქალაქეთა საცხოვრებელი გარემო. სამშენებლო ნებართვების გაცემის დაურეგულირებელმა პრაქტიკამ ქალაქი ბეტონის ჯუნგლებად აქცია, სადაც არ რჩება დასასვენებელი ადგილები და სუფთა ჰაერი. პოლიტიკური გაერთიანება ,,ლელო საქართველოსთვის“ იწყებს საქართველოს ყველა რეგიონსა და ქალაქში მასშტაბურ კამპანიას ,,გაამწვანე შენი უბანი“. ჩვენ უნდა შევცვალოთ გარემო უკეთესობისკენ ჩვენივე ძალისხმევით და შევქმნათ სივრცეები, სადაც ჩვენი შვილები უსაფრთხოდ და ჯანსაღად იქნებიან’’, – გვითხრა პოლიტიკური გაერთიანება „ლელო საქართველოსთვის” აჭარის ორგანიზაციის ხელმძღვანელმა ირაკლი კუპრაძემ.
მისივე თქმით, კამპანია „გაამწვანე შენი უბანი” მასობრივ სახეს მიიღებს და ბათუმის ყველა უბანს მოიცავს.
