მიხეილ ჩხენკელი: მადლობა მასწავლებლებო, თქვენ გმირები ხართ!
ნანა აბულაძე 577 20 35 90 –
ლექტორ-მასწავლებლების მიმართ მადლიერების გამოხატვით დაიწყო და დაასრულა განათლების ანტიკრიზისული გეგმის წარდგენა საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა:
– მინდა დიდი მადლობა გადავუხადო მასწავლებლებს და ლექტორ-პროფესორებს იმ ნამდვილი გმირობისთვის, რომელიც მათ ჩაიდინეს. ჩვენს სახელოვან ექიმებთან ერთად, ისინი ნამდვილად ფრონტის წინა ხაზზე იდგნენ. ზოგადი განათლების სისტემაში დანერგილი დისტანციური სწავლების შედეგების გათვალისწინებით, შეგვიძლია ხაზგასმით ვთქვათ, რომ ეს სემესტრი შედგა! ეს არის მთელი ჩვენი საგანმანათლებლო სფეროს დიდი დამსახურება, – განაცხადა მიხეილ ჩხენკელმა .
მინისტრმა ყურადღება გაამახვილა განათლების სისტემაში დისტანციური სწავლების დანერგვაზე და დასძინა, რომ აღნიშნულმა სიახლემ საერთაშორისო ორგანიზაციების მხრიდან მაღალი შეფასება დაიმსახურა. მისივე თქმით, ასევე მაღალი შეფასება მიიღო ისეთმა მნიშვნელოვანმა პროექტმა, როგორიცაა „ტელესკოლა”.
