რა შემთხვევაში ეკრძალება დამსაქმებელს სტაჟიორის შრომის გამოყენება?
ნანა აბულაძე: 577 20 35 90 –
საქართველოს პარლამენტში „საქართველოს შრომის კოდექსში“ შესატან ცვლილებებზე იმსჯელებენ, რომელშიც საუბარია ანაზღაურებადი და არაანაზღაურებადი სტაჟირების ვადის დაწესებაზე, ასევე, მამებისთვის ანაზღაურებადი შვებულების აღებაზე.
უფრო დეტალურად – შრომის კოდექსს ახალი მუხლი ემატება, რომელიც დამსაქმებელს უკრძალავს სტაჟიორის შრომის გამოყენებას მასთან შრომითი ხელშეკრულების დადების გარეშე. კანონპროექტში ვკითხულობთ, რომ არაანაზღაურებადი სტაჟირების ვადა არ უნდა აღემატებოდეს 6 თვეს, ხოლო ანაზღაურებადი – 1 წელს. იქვე განმარტებულია, რომ ერთ ადამიანს უფლება აქვს, მხოლოდ ერთხელ გაიაროს სტაჟირება იგივე კომპანიასა თუ დაწესებულებაში, იგივე დამსაქმებელთან.
შრომის კოდექსში კიდევ ერთი ცვლილების შეტანაზეა საუბარი. კონკრეტულად საკითხი ეხება მამების ანაზღაურებად შვებულებას ბავშვის მოვლის გამო. თუ აქამდე მამების შვებულების საკითხი კოდექსში ცალკე არ იყო გამოყოფილი, ცვლილების თანახმად, შვილის მოვლის მიზნით, შვებულება, ორსულობის და მშობიარობის შვებულების გამოყენებული დღეების გამოკლებით, შეუძლია მთლიანად, ან ნაწილობრივ გამოიყენოს ბავშვის დედამ ან მამამ. მამას, რომელიც არის დასაქმებული, შეუძლია მოითხოვოს ანაზღაურებადი შვებულება 126 კალენდარული დღის ოდენობით, ხოლო მშობიარობის გართულების ან ტყუპის შეძენის შემთხვევაში – 143 კალენდარული დღის ოდენობით.კოდექსში შესატან ცვლილებებში ვკითხულობთ, რომ ზემოთ აღნიშნულ შემთხვევაში, დასაქმებული ვალდებულია, დამსაქმებელი 2 კვირით ადრე გააფრთხილოს, რომ მას შვებულების აღება სურს.
