აჭარის საზოგადოებრივი მაუწყებლის მრჩევლების ანგარიში – უმაღლეს საბჭოში
მარიამ ხითარიშვილი: 27 48 93 –
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭომ რეგიონის საკანონმდებლო ორგანოში გასული წლის ბიუჯეტი შეაჯამა. საფინანსო-საბიუჯეტო და ეკონომიკურ საკითხთა კომიტეტის სხდომა 3 საათზე მეტ ხანს გაგრძელდა. ანგარიში 2019 წლის საქმიანობას ეხებოდა. სხდომას მაუწყებლის ალტერნატიული პროფკავშირის წევრებიც ესწრებოდნენ.
მრჩეველთა საბჭოს თავმჯდომარე გიგა ჩხარტიშვილმა მაუწყებლის პრიორიტეტების შესრულებაზე ისაუბრა. სხდომაზე სიტყვიერი დაპირისპირებაც იყო, რაც კონკრეტულ საკითხებზე ალტერნატიული პროფკავშირის წარმომადგენლების რეპლიკებს მოჰყვა. მმართველი გუნდის დეპუტატებმა მათ რეგლამენტი შეახსენეს და განუმარტეს, რომ მას შემდეგ გამოვიდოდნენ, რაც ანგარიშის წარდგენა და დეპუტატების შეკითხვები დასრულდებოდა.
ალტერნატიული პროფკავშირის წევრებმა მაუწყებლის მენეჯმენტის გადაწყვეტილებები გააკრიტიკეს. მათი მოსაზრებით, სამსახურიდან გაათავისუფლეს ის ჟურნალისტები, რომლებიც აფილირებულები არიან „ალტერნატიულ პროფკავშირთან“ და მენეჯმენტს თხოვეს, ამ საკითხებთან დაკავშირებით მეტი ინფორმაცია მიაწოდონ საზოგადოებას. მათვე გააკრიტიკეს არხის 8-საათიანი საინფორმაციო გამოშვებაც და აღნიშნეს, რომ მიმდინარეობს საინფორმაციო პოლიტიკის შეცვლა.
–პირველ რიგში, მინდა ვთქვა, რომ ჩვენ დავინახეთ ორმაგი სტანდარტი. მაშინ, როდესაც ნათია კაპანაძე გადააყენეს, ამის ერთ-ერთ მიზეზად დასახელდა პრიორიტეტების შეუსრულებლობა, ხოლო დღეს, როცა მოქმედი მენეჯმენტი არ ასრულებს პრიორიტეტებს, ვერ დავინახე მრჩეველთა საბჭოს პოზიცია, რა გადაწყვეტილებას მიიღებენ ასეთი მენეჯმენტის შემთხვევაში. ჩვენ ვიცით, რომ შიმშილობს ადამიანი, ვნახეთ არაერთი არასამთავრობო ორგანიზაციის შეფასება აჭარის ტელევიზიაში მიმდინარე მოვლენებთან დაკავშირებით და ჩვენთვის მნიშვნელოვანია, აჭარის ტელევიზია იყოს თავისუფალი, – განაცხადა აჭარის უმაღლესი საბჭოს დეპუტატმა, „ერთიანი ნაციონალური მოზრაობის“ წევრმა გია აბულაძემ.
– დავწერეთ ანგარიში, რომელიც გადაეგზავნა ყველა მრჩეველს იმისთვის, რომ წარმოედგინათ მოსაზრებები. წარმოდგენილი იყო ნული მოსაზრება. ახლა იმით აპელირება, რომ ჩართული არ ვიყავით, არის ტყუილი! ანგარიში საკმაოდ თვითკრიტიკულია, სადაც წერია ის ხარვეზები, რომლებიც უნდა შესრულებულიყო და ვერ შესრულდა, თუმცა ეს არ ნიშნავს, რომ ვიღაცამ ჩასაფრებული პოზიციიდან ისაუბროს. ეს გაკეთდა იმისთვის, რომ საზოგადოებამაც იცოდეს და ჩაერთოს. ყველამ ერთად უნდა დავძლიოთ ის საკითხები, რომლებიც მაუწყებლისთვის არსებითი და მნიშვნელოვანია, – თქვა გიგა ჩხარტიშვილმა. მისივე თქმით, მიმდინარე პროგრამებში პრიორიტეტული უნდა იყოს სოციალურ-ეკონომიკური მიმართულების პროექტები, ასევე, თვითმმართველობა, საგამოძიებო ჟურნალისტიკა, ეკოლოგია, განათლება, საბავშვო და მოზარდთა გადაცემები, კულტურულ-საგანმანათლებლო პროგრამები, დოკუმენტური და მხატვრული ფილმები, სპორტი და ა.შ.
