ბათუმში, ბაგრატიონის ქუჩის მცხოვრებლები კორპუსის მშენებლობას აპროტესტებენ
მარიამ ხითარიშვილი; 27 48 93 –
ბათუმში, ბაგრატიონის ქუჩის 28 ნომერში ახალაშენებული სახლის გვერდით კორპუსი შენდება, რასაც ადგილობრივები აპროტესტებენ. ისინი ამბობენ, რომ მიმდინარე მშენებლობა მომიჯნავე სახლებთან მხოლოდ 50 სანტიმეტრით არის დაშორებული, ხოლო ფანჯრები ერთმანეთის პირისპირაა, რის გამოც მათ ოთახები ჩაუბნელდათ, ამასთან, ყველა სტანდარტი დარღვეულია. აქციაზე შეკრებილების თქმით, რამდენჯერმე მშენებარე კორპუსის აივნიდან უცხო პირები მათ საცხოვრებელ ბინებში გადავიდნენ და იყო ძარცვის მცდელობა. ისინი ქალაქის მერიას და მშენებელ კომპანიას კანონის დარღვევაში ადანაშაულებენ და კორპუსის დემონტაჟს ითხოვენ. წინააღმდეგ შემთხვევაში აქციებს აანონსებენ.
დეველოპერულ კომპანიაში ამბობენ, რომ მშენებლობა ყველა სტანდარტის დაცვით მიმდინარეობს და არ იზიარებენ ადგილობრივების პოზიციას.
-ჩემი პროექტი უფრო ადრე დამტკიცდა, მაგრამ მეორე მშენებელმა დამასწრო. მან ადგილობრივები მოატყუა, უთხრა, რომ აქ სკვერი გაკეთდებოდა. ფუნდამენტის ჩასხმის შემდეგ პროექტი როგორც შემეძლო შევცვალე. დემონტაჟი გამორიცხულია. არც მშენებლობაა უკანონო. მეც ვზარალდები, ფაქტობრივად, ერთ მხარეს ვერ გავყიდი, – განაცხადა შპს „ბაგრატიონი 26-ის“ დირექტორმა.
– 50 სანტიმეტრში როგორ გავაგრძელოთ ცხოვრება? გარდა იმისა, რომ ქურდობის უკვე 5 ფაქტი იყო, საშინელი მდგომარეობაა. მოგვატყუეს, გვითხრეს, რომ უნდა გაკეთებულიყო სკვერი, მაგრამ როგორც ვხედავთ, მრავალსართულიანი სახლი შენდება. განცხადებაც დავწერეთ, თუმცა – არანაირი რეაქცია და რეაგირება. გვიპასუხეს, რომ ვერ ხედავდნენ რამე სახის დარღვევას! – ამბობს ადგილობრივი მცხოვრები მადონა სამხარაძე.
-კორპუსის მცხოვრებლები აფრთხილებენ ხელისუფლებასაც და კომპანიასაც, რომ თუ ერთი კვირის განმავლობაში არ იქნება გათვალისწინებული მათი მოთხოვნები, ისინი, ორგანიზებულად, უკვე ხელისუფლებასთან გადაინაცვლებენ, – განაცხადა უფლებადამცველმა თამაზ ბაკურიძემ.
