აჭარაში ახალი კორონავირუსის კიდევ 230 შემთხვევა გამოვლინდა
მარიამ ხითარიშვილი: 27 48 93 –
დღეს, 8 ოქტომბერს, აჭარაში ახალი კორონავირუსის 230 შემთხვევა დადასტურდა, გარდაიცვალა სამი პაციენტი. აჭარის საზოგადოებრივი ჯანდაცვის ცენტრის დირექტორის მოადგილე ნონა ეფაძის განმარტებით, გარდაცვლილია 52 წლის მამაკაცი, და ასევე – ორი ქალი (62 და 84 წლის). მისივე თქმით, რეგიონში გასულ დღე-ღამეში 230 პაციენტი გამოჯანმრთელდა.
– გასული დღე-ღამის განმავლობაში ახალი კორონავირუსის კიდევ 230 ლაბორატორიულად დადასტურებული შემთხვევა გამოვლინდა. გამოჯანმრთელდა ასევე 230 პაციენტი. სამწუხაროდ, ვირუსით გარდაცვლილია სამი ადამიანი: 52 წლის მამაკაცი, 62 და 84 წლის ქალბატონები. აჭარის კოვიდკლინიკებში მკურნალობას გადის 472 პირი, აქედან 14 ბავშვია, 20 კი ორსული. რეანიმაციაში მკურნალობს 42 პაციენტი. კოვიდსასტუმროებში ექიმების მეთვალყურეობის ქვეშ 903 პირი იმყოფება, მათ შორის – 93-მდე ბავშვი. ბინაზე მკურნალობას აგრძელებს 800-მდე კოვიდინფიცირებული. ახალი ინფიცირებულები, კვლავ, აქამდე გამოვლენილი კოვიდდადებითი პაციენტების ახლო კონტაქტში მყოფი პირები არიან. შეგვიძლია ვთქვათ, რომ შემთხვევების კლებასთან მიმართებაში სტაბილური მდგომარეობაა, – განაცხადა აჭარის საზოგადოებრივი ჯანდაცვის ცენტრის დირექტორის მოადგილე ნონა ეფაძემ.
არსებული ინფორმაციით სულ საქართველოში ახალი კორონავირუსის 472 შემთხვევა გამოვლინდა. ამჟამად, ინფიცირებულთა საერთო რაოდენობა 10225-ს შეადგენს. აქედან გამოჯანმრთელებულია 5553 ადამიანი. ბოლო მონაცემებით, კარანტინის რეჟიმში იმყოფება 5824 მოქალაქე, ხოლო სტაციონარში მეთვალყურეობას 836 ადამიანი გადის.
