ყველაზე მაღალი აქტივობა ქედის ოლქში დაფიქსირდა
ნათია იმნაიშვილი: 27 48 93 –
აჭარის უმაღლეს საარჩევნო კომისიაში შემაჯამებელი ბრიფინგი გაიმართა. როგორც უსკო-ში განაცხადეს, აჭარაში სამი მაჟორიტარული ოლქის 373-ვე უბანი დახურულია და დაწყებულია ხმის დათვლის პროცედურა.
– 31 ოქტომბრის აჭარის ავტონომიური რესპუბლიკის უმაღლესი საბჭოს არჩევნებისათვის საარჩევნო უბნებზე კენჭისყრის პროცედურა უკვე დასრულდა. აჭარის სამი მაჟორიტარული ოლქის 373-ვე უბანზე დაწყებულია ხმის დათვლის პროცედურა. საკუთარი არჩევანი განახორციელა საარჩევნო უბანზე მისულმა 186 182 ამომრჩეველმა, რაც ამომრჩეველთა საერთო რაოდენობის, ანუ 314 889 ამომრჩევლის 59,12% პროცენტს წარმოადგენს. 2016 წლის არჩევნების აქტივობის მაჩვენებელი იყო – 52,97%, კერძოდ, უბანზე მისული 163 419 ამომრჩეველი. ამომრჩეველთა აქტივობა ოლქების მიხედვით ასე გამოიყურება: ბათუმის ოლქი – 81 222 ამომრჩეველი – 55,14%; ქობულეთის ოლქი – 43 186 ამომრჩეველი – 60,9 %; ხელვაჩაურის ოლქი – 25 402 ამომრჩეველი – 60,9%; შუახევის ოლქი – 10 057 ამომრჩეველი – 66,52%; ქედის ოლქი – 11304 ამომრჩეველი – 71,9%; ხულოს ოლქი – 15 011 ამომრჩეველი – 61,96%; კენჭისყრის პროცესის დასრულების შემდეგ დაიწყო ხმის დათვლის პროცედურები. მას შემდეგ, რაც შედგება საუბნო საარჩევნო კომისიების შემაჯამებელი ოქმები, მათ შესაბამისი საოლქო საარჩევნო კომისია დაუყოვნებლივ მიაწოდებს უსკოს და მიღებისთანავე აიტვირთება უსკოს ვებგვერდზე, – განაცხადეს აჭარის უმაღლეს საარჩევნო კომისიაში.
რაც შეეხება საჩივრებს, როგორც უსკო-ში აცხადებენ, აჭარის მასშტაბით, საოლქო და საუბნო საარჩევნო კომისიებში დაწერილია დაახლოებით 40-მდე საჩივარი. ნაწილი დარღვევებისა პროცედურული ხასიათისაა და ძირითადად, ადგილზევეა აღმოფხვრილი. საჩივრებს 2 დღის ვადაში განიხილავენ შესაბამის საარჩევნო კომისიებში.
