ბათუმში ქართულ-ამერიკული აკადემია გაიხსნება
ხატია იაშვილი: 591 98 24 26 –
მალე ბათუმს თანამედროვე სტანდარტების აუდიტორიებით, სპორტდარბაზებით, კაფეტერიებითა და ლაბორატორიებით აღჭურვილი ქართულ- ამერიკული აკადემია შეემატება. სასწავლებელი 2021 წელს გაიხსნება, დღეს კი საძირკველში სიმბოლური კაფსულა აჭარის მთავრობის თავმჯდომარე თორნიკე რიჟვაძემ, განათლების, კულტურისა და სპორტის მინისტრ მაია ხაჯიშვილთან, აკადემიის და კომპანია ,,ანაგის’’ ხელმძღვანელ პირებთან ერთად ჩააგდო.
– ბათუმში აქტიურად შენდება და ძალიან მალე დასრულდება განათლების და მეცნიერების ქალაქი. ბოლო ერთი თვის განმავლობაში საფუძველი ჩავუყარეთ კავკასიის უნივერსიტეტის მშენებლობასაც. დღეს გამორჩეული დღეა, ვინაიდან საფუძველი ჩაეყარა საერთაშორისო ქართულ-ამერიკული აკადემიის მშენებლობას, რაც მოგვცემს საშუალებას, რომ ჩვენს ქალაქში, რეგიონში ყველასთვის ხელმისაწვდომი გახდეს ხარისხიანი განათლება, როგორც სკოლამდელი, ასევე წინა საუნივერსიტეტო პროგრამების თვალსაზრისით.
მნიშვნელოვანია, რომ ჩვენმა მოსწავლეებმა, ჩვენმა ახალგაზრდებმა იმ ხარისხით მიიღონ განათლება, რაც მათ გახდის კონკურენტუნარიანს როგორც ქვეყნის, ასევე საერთაშორისო და გლობალურ ბაზრებზე. განსაკუთრებით მახარებს კერძო სექტორის აქტიურობა, მათი დაინტერესება საგანმანათლებლო ინფრასტრუქტურით, რაც ასევე მნიშვნელოვანია. ბათუმი ვითარდება არა მხოლოდ სამშენებლო ტურისტული მიმართულებით, არამედ განათლებასაც დიდი ყურადღება და რესურსი ეთმობა, – განაცხადა თორნიკე რიჟვაძემ.
როგორც ორგანიზატორებმა აღნიშნეს, ქართულ-ამერიკული აკადემია აღჭურვილი იქნება თანამედროვე სტანდარტების მიხედვით, განხორციელდება 10 მილიონი ლარის ინვესტიცია. აკადემია 800-მდე მოსწავლეს მიიღებს და მათ უმაღლესი ხარისხის ეროვნულ და ამერიკულ განათლებას შესთავაზებს.
აღნიშნულ პროექტს სკოლა „პროგრესი“ შპს „ანაგი განათლებასთან“ ერთად განახორციელებს. ეს იქნება პირველი ქართულ-ამერიკული საერთაშორისო აკადემია დასავლეთ საქართველოში სკოლამდელი, დაწყებითი, საბაზო, საშუალო განათლებისა და წინასაუნივერსიტეტო პროგრამებით.
აკადემიას ასევე ექნება ამერიკული საატესტატო-სადიპლომო უმაღლესი სკოლა მათთვის, ვისაც სურს ამერიკული საერთაშორისო ატესტატის აღება და სწავლის გაგრძელება საერთაშორისო კოლეჯებსა და უნივერსიტეტებში.
პროგრამა აკრედიტებულია ამერიკის სააკრედიტაციო სააგენტოს 
-ის და ,,უმაღლესი სასწავლებლების საბჭოს” მიერ.
