მაიკ პომპეო საქართველოშია
ცეცილი ირემაძე: 27 48 93 –
ამერიკის შეერთებული შტატების სახელმწიფო მდივანი საქართველოშია. აეროპორტში მას საქართველოს საგარეო საქმეთა მინისტრი დავით ზალკალიანი და აშშ-ში საქართველოს ელჩი დავით ბაქრაძე დახვდნენ. მაიკ პომპეო ოფიციალურ შეხვედრებს ხვალიდან დაიწყებს.
პომპეო საქართველოს პრემიერ-მინისტრს, პრეზიდენტს, საგარეო საქმეთა მინისტრსა და საქართველოს კათოლიკოს პატრიარქს შეხვდება. სავაჭრო ურთიერთობები, შავი ზღვის უსაფრთხოება და სტრატეგიული ურთიერთობების კიდევ უფრო განმტკიცება – ასეთი მოლოდინი აქვს თბილისს. საქართველოში ელოდებიან, რომ ქართულ-ამერიკული ურთიერთობები კიდევ უფრო მაღალ ნიშნულზე ავა.
„ჩვენ ყველა ვთანხმდებით, როგორც საქართველო, ისე შეერთებული შტატები, რომ თავდაცვის და უსაფრთხოების სფეროში ჩვენი თანამშრომლობა უაღრესად აღმავალია“, – განაცხადა დავით ზალკალიანმა. საგარეო საქმეთა მინისტრმა აეროპორტში შეკრებილ ჟურნალისტებს განუმარტა, რომ ჯერ კიდევ წინა ადმინისტრაციის დროს, 2016 წელს გაფორმდა მემორანდუმი ამ სფეროში თანამშრომლობის შესახებ, რომელიც კარგად შესრულდა. ამ მიმართულებით საქმიანობა ტრამპის ადმინისტრაციასთანაც გაგრძელდა.
„ამერიკის შეერთებულმა შტატებმა საქართველოს გადმოსცა ჯაველინების სისტემა ჩვენი თავდაცვის, მდგრადობის გასაძლიერებლად. ეს არის ის კონკრეტული მაგალითი, რაზეც დგას ჩვენი თანამშრომლობა, რაც აძლიერებს ჩვენს მდგრადობას იმ გამოწვევების წინაშე, რომელთა წინაშეც დგას საქართველო. ამიტომ ამ ვიზიტის ფარგლებში ყველა ამ საკითხზე გვექნება შეფასება – სად ვართ, სად ვიმყოფებით, და რა ნაბიჯები უნდა გადაიდგას წინ, იმისთვის, რომ ამერიკასა და საქართველოს შორის მუდმივად იყოს მჭიდრო ურთიერთობები“,- აღნიშნა ზალკალიანმა.
მინისტრმა ასევე ხაზი გაუსვა სამხედრო წვრთნებს, რომლებიც ნატოს ფარგლებში, საქართველოს ხელმძღვანელობით ჩატარდა.
