ელექტროავტობუსებში თერმოსკრინინგის აპარატები დამონტაჟდა
ხატია იაშვილი: 591 98 24 26 –
ბათუმში ახლად შემოყვანილ ელექტროავტობუსებში თერმოსკრინინგის აპარატები დამონტაჟდა. შედეგის გაგება შესაძლებელია როგორც მონიტორზე, ასევე ხმოვანი შეტყობინების საშუალებით. თერმოსკრინინგის ჩატარებისკენ მგზავრებს გაჩერებებზე ავტომატურ რეჟიმში მოუწოდებენ. პროექტი საპილოტეა, რის შემდეგაც მსგავსი აპარატების დამონტაჟება სხვა ავტობუსებშიც იგეგმება.
– ახალი კორონავირუსის გავრცელების თავიდან ასაცილებლად მუნიციპალურ ელექტროავტობუსებში დავამონტაჟეთ თერმოსკრინინგის აპარატები, რომელთა მეშვეობითაც გაკონტროლდება, ხომ არ აქვთ მგზავრებს ტემპერატურა. სატესტო რეჟიმის შემდეგ, ვგეგმავთ აპარატების მონტაჟს სხვა ავტობუსებშიც. მოგეხსენებათ, მუნიციპალური ავტობუსები, ასევე, აღჭურვილია სადეზინფექციო ხსნარებით. აღსანიშნავია, რომ ბათუმი პირველი ქალაქია საქართველოში, სადაც, კორონავირუსის გავრცელების თავიდან აცილების მიზნით, მუნიციპალურ ტრანსპორტში მსგავსი სიახლე დაინერგა, – განაცხადა ბათუმის მერის მოვალეობის შემსრულებელმა არჩილ ჩიქოვანმა.
შეგახსენებთ, რომ ბათუმის მუნიციპალიტეტმა სულ 8 ერთეული ელექტროავტობუსი შეიძინა. მათი საერთო ღირებულება 4 მილიონ ევრომდეა.
– ბათუმს განახლებული ავტოპარკი აქვს. ელექტროავტობუსები ევროპის რეკონსტრუქციისა და განვითარების ბანკის დაფინანსებით არის შეძენილი. ახალი სატრანსპორტო პოლიტიკა, რაც გულისხმობს ქალაქის ავტოპარკის ეტაპობრივად განახლებას, პანდემიის მიუხედავად არ შეცვლილა. ავტობუსები ადაპტირებულია შშმ პირებზე. ბათუმი არის ერთ-ერთი პირველი ქალაქი, სადაც ელექტროავტობუსები მოძრაობს. პროცესი მომავალ წელსაც გაგრძელდება, – განაცხადა აჭარის მთავრობის თავმჯდომარე თორნიკე რიჟვაძემ.
70 მგზავრზე გათვლილი 9,5 მეტრი სიგრძის თანამედროვე სტანდარტების ელექტროავტობუსებში 24 დასაჯდომი ადგილია. ტრანსპორტში დამონტაჟებულია გათბობა და კონდიცირება, ხმოვანი სისტემა და ვიდეოკამერები. ელექტროავტობუსს დამუხტვის გარეშე 25 კილომეტრის გავლა შეუძლია.
