თორნიკე რიჟვაძე: წინასწარი მონაცემებით, ლიდერობენ ჩვენი მაჟორიტარობის კანდიდატები
ნინო მელია: 27 48 93 –
დღეს, 21 ნოემბერს, რეგიონში, ისევე, როგორც მთელ საქართველოში, საპარლამენტო არჩევნების მეორე ტური გაიმართა, ასევე, უმაღლესი საბჭოს არჩევნებიც. აჭარის მთავრობის თავმჯდომარე თორნიკე რიჟვაძემ მასმედიისთვის გამართულ ბრიფინგზე ერთგვარად შეაჯამა საარჩევნო პროცესი:
-მოგეხსენებათ, დღეს ჩატარდა როგორც საქართველოს პარლამენტის, ისე აჭარის უმაღლესი საბჭოს არჩევნების მეორე ტურები. წინასწარი მონაცემებით, ლიდერობენ ჩვენი მაჟორიტარობის კანდიდატები. ჯერჯერობით, როგორც საქართველოს პარლამენტში, ისე უმაღლეს საბჭოში, მანდატების უმეტესობა მოიპოვა პოლიტიკურმა გაერთიანება „ქართულმა ოცნებამ“. ამ არჩევნების დემოკრატიულ, თავისუფალ გარემოში ჩატარება მინდა მივულოცო ჩვენს ქვეყანას, თითოეულ მოქალაქეს, მიუხედავად იმისა, რომელ პარტიას მისცა ხმა. განსაკუთრებული მადლობა მინდა გადავუხადო ჩვენს მხარდამჭერებს, ამომრჩევლებს, რომლებმაც მიუხედავად გაზრდილი ეპიდემიოლოგიური რისკებისა, მიიღეს მონაწილეობა, მისცეს ხმა, დააფიქსირეს თავისი მხარდაჭერა ამ ქვეყნის შეუქცევადი, დემოკრატიული განვითარებისადმი. განსაკუთრებული მადლობა მინდა გადავუხადო აჭარის მოსახლეობას. დღესაც ერთ-ერთი ყველაზე მაღალი აქტივობა დაფიქსირდა მაღალმთიან აჭარასა და ხელვაჩაურში, ასევე განსაკუთრებული მადლობა – ქობულეთსა და ბათუმს, ვინაიდან აქ გვქონდა უპრეცედენტო მხარდაჭერა. როგორც პირველ ტურში, ასევე, დღესაც იგრძნობოდა აქტიურობა და მხარდაჭერა. საარჩევნო პროცესი, წინასაარჩევნო კამპანია დაკავშირებული იყო არაერთ გამოწვევასთან, როგორც კოვიდთან, ისე რიგი პოლიტიკური ჯგუფების მხრიდან ამ არჩევნების დისკრედიტაციასთან, მაგრამ ჩვენ, ყველამ ერთად შევძელით არჩევნები ჩატარებულიყო ღირსეულად, – თქვა აჭარის ლიდერმა აღნიშნულ ბრიფინგზე.
