ონლაინშეხვედრა – ქართული გამოცდილების გასაზიარებლად
ხატია იაშვილი: 555 18 48 88 –
ორი დღის წინ დასავლეთ უკრაინის სახელმწიფო უნივერსიტეტის სოციალურ- ჰუმანიტარული ფაკულტეტის ერთ-ერთი პროგრამის ფარგლებში ონლაინშეხვედრა გაიმართა თემაზე „შეზღუდული შესაძლებლობის მქონე პირთა უფლებები ქართული გამოცდილების მაგალითზე”. მასში საჯარო სამართლის მაგისტრი, პედაგოგი, ა/ო “შშმ პირთა უფლებებისთვის” დამფუძნებელი თამაზ მჟავანაძე, ასევე, უკრაინის სახელმწიფო უნივერსიტეტის წარმომადგენლები, სტუდენტები, შშმ პირთა მშობლები და არასამთავრობო ორგანიზაციის წამომადგენლები მონაწილეობდნენ. ონლაონლექციაზე სამომავლო თანამშრომლობაზე ისაუბრეს. როგორც ჩვენთან საუბარში თამაზ მჟავანაძემ აღნიშნა, მიუხედავად იმისა, რომ უკრაინულ მხარესთან ბათუმის შოთა რუსთაველის სახელმწიფო უნივერსიტეტი დიდი ხანია თანამშრომლობს, შშმ პირთა კუთხით ეს პირველი პრაქტიკული ონლაინშეხვედრა იყო.
-ვისაუბრეთ ურთიერთთანამშრომლობის პერსპექტივებზე. აღსანიშნავია ის ფაქტი, რომ, მიუხედავად იმისა, უკრაინულმა მხარემ 2009 წელს, საქართველოზე ადრე მოაწერა ხელი გაეროს შშმ პირთა კონვენციას, ისინი ჯერ კიდევ შიდა კანონისა და კონვენციის ჰარმონიზაციის ეტაპზე არიან. ქართული მაგალითი მათთვის საინტერესო აღმოჩნდა, ვინაიდან რეფორმები, რომლებიც ჩვენ უკვე გავატარეთ, უკრაინაში ჯერ კიდევ დასანერგია. მაგალითად, მათთვის უცხოა კონსტიტუციის დონეზე ჩანაწერი შშმ პირთა შესახებ, რაც ჩვენ მოვახერხეთ. მათ დასაქმების კუთხით კვოტირების სისტემა აქვთ
(5 თანამშრომლიდან 1 შშმ პირი უნდა იყოს), ჩვენ – არა. საერთო ჯამში, ერთმანეთს საინტერესო გამოცდილება გავუზიარეთ და ვფიქრობთ, რომ თანამშრომლობა მომავალშიც გაგრძელდება, – გვითხრა თამაზ მჟავანაძემ.