ქალაქის მთავარი ნაძვის ხე აინთო
ხატია იაშვილი: 591 98 24 26 –
გუშინ ბათუმის ბულვარში ქალაქის მთავარი ნაძვის ხე აინთო. პანდემიის გამო ღონისძიება მუსიკალურად მხოლოდ რევაზ ლაღიძის სახელობის გოგონათა გუნდმა გააფორმა, ბათუმის მერის მოვალეობის შემსრულებელმა არჩილ ჩიქოვანმა კი, ტრადიციულად, მრავალშვილიან ოჯახებს, რომლებსაც 7 ან მეტი შვილი ჰყავთ, საცხოვრებელი ბინები გადასცა. წელს ახალი სახლის გასაღები 4 ოჯახს გადაეცა. ,,წელს ჩვენ უჩვეულო ამპლუაში გვიხდება ბათუმის მთავარი ნაძვის ხის ანთება. მოგეხსენებათ, გასულ წლებში ამ დღეს ასობით ადამიანი იყო აქ შეკრებილი. იყო ზეიმი, სადღესასწაული განწყობა, ბავშვების ჟრიამული, რომელიც დღეს ძალიან დაგვაკლდა. პანდემიიდან გამომდინარე, წელს მივიღეთ გადაწყვეტილება, რომ მასშტაბური ღონისძიებები არ ჩაგვეტარებინა. ალბათ ყველამ იცით, რომ ბათუმში უკვე წლებია, ყოველ 25 დეკემბერს, ნაძვის ხის ანთების დროს ბინებს გადავცემთ იმ მრავალშვილიან ოჯახებს, ვისაც 7 და მეტი შვილი ჰყავთ. ამ ტრადიციას არც წელს ვღალატობთ და დღეს 4 ოჯახს გარემონტებულ ბინებს გადავცემთ.
ამ ოჯახებსა და სრულიად საქართველოს, მინდა ვუსურვო მშვიდობა, ჯანმრთელობა და დღეგრძელობა. გილოცავთ დამდეგ შობა-ახალ წელს და მჯერა, რომ ჩვენ ერთად გავიმარჯვებთ პანდემიასთან ბრძოლაში”, – აღნიშნა არჩილ ჩიქოვანმა.
აღსანიშნავია ის ფაქტი, რომ უკვე მეორე წელია, ბათუმის მთავარი ნაძვის ხე ბულვარში იდგმება. წელსაც ზუსტად იგივე, დიზაინერ ნიკოლოზ თოფურიძის მიერ შეშექმნილი, ნაძვის ხე დაიდგა, რომლითაც შარშან იზეიმა ქალაქმა ახალი წელი.
