ირაკლი ფანგანს 2000-ლარიანი გირაო დაეკისრა
ხატია იაშვილი 55518 48 88 –
დღეს არასამთავრობო ორგანიზაცია „ალტერნატივას“ აქტივისტ ირაკლი ფანგანს ბათუმის საქალაქო სასამართლომ, აღკვეთის ღონისძიების სახით, 2000-ლარიანი გირაო შეუფარდა. ბრალდებულს აღნიშნული თანხის გადასახდელად 40-დღიანი ვადა მიეცა, პარალელურად კი ირაკლი ფანგანი კვირაში ერთხელ გამომძიებელთან უნდა გამოცხადდეს.
სასამართლო პროცესის დასრულების შემდეგ ბრალდებულმა აღნიშნა, რომ ჩადენილს არ ნანობს და ბრძოლას გააგრძელებს.
– ისევ, ძველებურად ვიაქტიურებ, აქციებშიც მივიღებ მონაწილეობას და ვიბრძოლებ ბოლომდე. პოზიცია არ შემიცვლია, მაგრამ მე თუ არა, სხვა გააკეთებს ანალოგიურს. სასამართლოს გადაწყვეტილებას ვეთანხმები, – განაცხადა ირაკლი ფანგანმა.
ამასთან, მოსამართლის გადაწყვეტილებით, ირაკლი ფანგანს დეპუტატ ირაკლი ჩავლეიშვილთან საქმის საბოლოო განხილვამდე მიახლოება ეკრძალება. წინა სასამართლო სხდომა 16 თებერვალს დაინიშნა.
– თქვენ ხართ იმისთვის, რომ გამოხატოთ თქვენი აზრი, მაგრამ შეიძლება პიროვნებას არ ჰქონდეს გათვითცნობიერებული, რა ფარგლებში უნდა განხორციელდეს შესაბამისი ქმედება. თქვენი გამოხატვის თავისუფლება იზღუდება იქ, სადაც იწყება სხვისი თავისუფლების შეზღუდვა. თქვენივე უსაფრთხოებისთვის, რომ დაცული იყოთ ბრალის დამძიმებისგან თქვენივე ქმედებით, სასამართლომ მიიღო ეს გადაწყვეტილება, – განუცხადა ბრალდებულს მოსამართლე ვიოლეტა ფორჩხიძემ.
შეგახსენებთ, რომ ბათუმში გამართულ საპროტესტო აქციაზე, სადაც ბულვარში მრავალსართულიანი შენობის მშენებლობას აპროტესტებდნენ, აჭარის უმაღლესი საბჭოს დამოუკიდებელ დეპუტატ ირაკლი ჩავლეიშვილს სამოქალაქო აქტივისტმა და არასამთავრობო ორგანიზაცია ,,ალტერანტივას” წევრმა ირაკლი ფანგანმა ნაგვის ურნიდან ნარჩენები თავზე დააყარა. ინციდენტი ევროპის მოედანზე მოხდა.
