მოსახლეობას სოფლის მეურნეობის სამინისტროს პროგრამები გააცნეს
ოთარ ცინარიძე 599 85 21 14 –
აჭარის ავტონომიური რესპუბლიკის სოფლის მეურნეობის სამინისტროს პროგრამის – „0706 სოფლის მეურნეობის განვითარება მაღალეფექტური ტექნოლოგიების დანერგვის გზით“ ფარგლებში დაგეგმილი ქვეპროგრამის „სასოფლო-სამეურნეო გაერთიანებებისა და საოჯახო მეურნეობების განვითარების ხელშეწყობა“ მიზანია სოფლისა და სოფლის მეურნეობის განვითარების ხელშეწყობა, პირველად წარმოებასთან ერთად რომ განვითარდეს ადგილზე წარმოებული პროდუქციის გადამუშავების შესაძლებლობები.
ქვეპროგრამით გათვალისწინებული თანადაფინანსება არის მიზნობრივი დასაქმების მექანიზმი და იგი უზრუნველყოფს სოფლად მცხოვრები მოსახლეობის ცხოვრების დონის გაუმჯობესებას ფინანსური და ტექნიკური დახმარების გზით. პროგრამა და ქვეპროგრამა ხულოს, შუახევის, ქედის მოსახლეობის წარმომადგენლებს გააცნეს აჭარის სოფლის მეურნეობის მინისტრმა გიორგი სურმანიძემ, მინისტრის მოადგილე სულხან მოწყობილმა, „აგროსერვისცენტრის“ დირექტორმა გოჩა ბერიძემ, სამინისტროს პასუხისმგებელმა მუშაკებმა. ღონისძიებებს დაესწრნენ საქართველოს პარლამენტისა და აჭარის ავტონომიური რესპუბლიკის უმაღლესი საბჭოს მაჟორიტარები ანზორ ბოლქვაძე, ფრიდონ ფუტკარაძე, თვითმმართველობის აღმასრულებელი და წარმომადგენლობითი ორგანოების ხელმძღვანელები.
ითქვა, რომ ქვეპროგრამის თანადაფინანსების მინიმალური რაოდენობა შეადგენს 5 ათას ლარს, ხოლო მაქსიმალური- 40 ათას ლარს. ეს წარდგენილი პროექტის ჯამური ღირებულების არაუმეტეს 80 პროცენტია, ხოლო ბენეფიციარის თანამონაწილეობა არანაკლებ – 20 პროცენტი. ქვეპროგრამის საერთო ბიუჯეტი ერთ მილიონ ლარს უახლოვდება.
პროგრამის პრიორიტეტული მიმართულებებია: მემცენარეობა, ბოსტნეული და ბაღჩეული კულტურები და ბაღჩეული კულტურების წარმოება; მეცხოველეობა.
ქვეპროგრამის ბენეფიციარები არიან საოჯახო მეურნეობები და სასოფლო-სამეურნეო გაერთიანებები.
ხულოში, შუახევსა და ქედაში გამართულ შეხვედრებზე დამსწრეთ ამომწურავი პასუხები გასცეს.
