კორონავირუსის შემთხვევები-ბაღსა და სკოლაში
ქობულეთის სოფელ ლეღვას საბავშვო ბაღი, სადაც კორონავირუსი ორ ბავშვს დაუფიქსირდა, დაიხურა. ეპიდემიოლოგების რეკომენდაციით, ბაღის პერსონალი, ბავშვები და აღმზრდელები მომდევნო 12 დღის განმავლობაში იზოლაციაში იქნებიან. ბაღის დირექტორი ნანა კაკალაძე ამბობს, რომ პედაგოგებს ტესტირება ჩაუტარდათ და ყველა მათგანის პასუხი უარყოფითია. ბავშვების ინფიცირების წყარო, სავარაუდოდ, ლეღვას სკოლაა, სადაც კოვიდის შემთხვევები დაფიქსირდა. ბაღების გაერთიანების ხელმძღვანელის ია ხალვაშის განცხადებით, მოზარდები თავს კარგად გრძნობენ. ინფიცირებულები არიან მათი ოჯახის წევრებიც.
კორონავირუსის შემთხვევების გამო, დროებით დაიხურა ქობულეთის სოფელ ნაკაიძეების საჯარო სკოლა. ვირუსი დაუდასტურდა ტექნიკური სამსახურის თანამშრომელს. მომდევნო ორი კვირის განმავლობაში სწავლა აქ დისტანციურ რეჟიმში გაგრძელდება.
კოვიდის შემთხვევები გამოვლინდა ქობულეთის მეორე საჯარო სკოლაში. ტესტირების შემდეგ, კოვიდი დაუდასტურდა მე-10 და მე-11 კლასის მოსწავლეებს. ინფიცირებულები არიან მათი ოჯახის წევრები. სოფელ მუხაესტატეს სკოლის მეცხრე კლასი დისტანციურ სწავლებაზე გადავიდა . ქობულეთის რესურსცენტრის ხელმძღვანელი მადონა გოგიტიძე აცხადებს, მუნიციპალიტეტის 46-საჯარო და 3-კერძო სკოლაში სავალდებულო ტესტირება ჩატარდება.
საერთო ჯამში, აჭარაში სხვადასხვა სკოლის 8 კლასი დისტანციურ რეჟიმში სწავლობს, ასევე, რეგიონში ოთხი საბავშვო ბაღი კორონავირუსის გამო დროებით დაიხურა.
ელენე საყვარელიძე
