ბაირამი მიულოცეს
ოთარ ცინარიძე 599 85 21 14 –
13 მაისს დასრულდა მუსლიმური კალენდრით გათვალისწინებული ერთთვიანი მარხვა. ისლამის მიმდევრებს 30 დღის განმავლობაში დილაუთენიიდან მიმწუხრამდე ჭამა, წყლის დალევა, აბის სახით წამლის მიღება ეკრძალებოდათ.
ქედის, შუახევის, ხულოს მუნიციპალიტეტებში და სხვა რეგიონებში მოსახლეობის ნაწილი ისლამის მიმდევარია. ისინი გულდასმით ასრულებენ იმ რიტუალებს, რასაც წმინდა წიგნი „ყურანი“ ქადაგებს.
30-დღიანი მარხვის დასრულების მომდევნო დღეს მუსლიმები რამადანის ბაირამს ზეიმობენ. დილაუთენია მეჩეთებში ხოჯა-მოლები მრევლთან ერთად არაბულ ენაზე ლოცვას აღავლენენ. ლოცვის დასრულების შემდეგ ოჯახებში ბრუნდებიან და სასაფლაოებზე გადიან.
კოვიდ-19-ის პანდემიის გამო წლევანდელი რამადანის ბაირამი რეგულაციების დაცვით იზეიმეს. ქედის, შუახევის, ხულოს აღმასრულებელი და წარმომადგენლობითი ორგანოების პირველი პირები, დეპუტატები მეჩეთებში მივიდნენ და მრევლს დღესასწაული მიულოცეს.
შუახევის მუნიციპალიტეტის მერის მოვალეობის შემსრულებელი ომარ ტაკიძე, მუნიციპალიტეტის საკრებულოს თავმჯდომარე გიორგი დავითაძე, საკრებულოს ფრაქციის თავმჯდომარე გურამ ზოიძე, ზამლეთის თემის მაჟორიტარი ამირან ბერიძე, საკრებულოს კომისიის თავმჯდომარე მირიან აბაშიძე ნიგაზეულის, ფურტიოს, ჭვანის, ხაბელაშვილების მეჩეთებში მივიდნენ და მომლოცველებს რამადანის ბაირამი მიულოცეს, ტკბილეულით გაუმასპინძლდნენ.
ჭვანის მეჩეთში ლოცვა შუახევის მუფთმა ასლან შარაშიძემ აღავლინა.
– მუნიციპალიტეტში 37 მეჩეთია. თითქმის ყველა მეჩეთში ლოცვა აღავლინეს. ყურადღების გარეშე მრევლი არ დაგვიტოვებია. რამდენიმე დღის წინ აღდგომის ბრწყინვალე დღესასწაული იყო. ტაძრებსა და სამლოცველოებში მრევლთან ერთად გახლდით. ორივე საღვთო დღესასწაული სათანადო რეგულაციების დაცვით ჩატარდა, – გვითხრა ომარ ტაკიძემ.
