საკრებულოს უფროსი სპეციალისტი სამსახურიდან გაათავისუფლეს
ნინო ცხვარაძე 595 96 63 63 –
ბათუმის საკრებულოს უფროსი სპეციალისტი გია აბულაძე სამსახურიდან გაათავისუფლეს. ამის მიზეზად ის ფეისბუქპოსტს ასახელებს, რომელიც რამდენიმე დღის წინ გააზიარა. გია აბულაძე ირწმუნება, რომ სამსახურიდან გათავისუფლების მიზეზი გიორგი გახარიას და მისი გუნდის მიმართ დამოკიდებულებაა.
-კვირას გაზიარებული ფეისბუქპოსტის გამო, ორშაბათს, საღამოს დამიბარეს და მითხრეს, რომ სამსახურიდან ჩემი განსხვავებული პოლიტიკური შეხედულებების გამო საკუთარი განცხადებით უნდა წავსულიყავი, რაზეც უარი ვთქვი, დღეს კი გამათავისუფლეს ბრძანებით, – აცხადებს გია აბულაძე, თუმცა იმათ კონკრეტულ სახელ-გავრებს არ ასახელებს, ვინც სამსახურიდან წასვლა მოთხოვა.
-კონკრეტული სახელ-გვარების დასახელებას აზრი არ აქვს. ოფიციალური ბრძანებით გათავისუფლებული ვარ მძიმე დისციპლინარული გადაცდომის გამო, რაც აბსურდულია, რადგან 6 წლის განმავლობაში შენიშვნაც კი არ მიმიღია, – ამბობს გია აბულაძე. გაასაჩივრებს თუ არა სასამართლოში სამსახურიდან გათავისუფლებას, ამაზე მას ჯერ არ აქვს პასუხი. გია აბულაძე ამბობს იმასაც, რომ დღეს სოციალური ქსელით გაიგო დიმიტრი ჭეიშვილის უმრავლესობიდან წასვლის თაობაზე და მას პოლიტიკურ ნაბიჯს უწონებს.
გია აბულაძის გათავისუფლებაზე კომენტარი „ქართული ოცნების“ რეგიონალურმა კოორდინატორმა, აჭარის უმაღლესი საბჭოს ფრაქცია „ქართული ოცნების“ თავმჯდომარე გიორგი მანველიძემ გააკეთა.
– გია აბულაძე სამსახურიდან ბრძანებითაა გათავისუფლებული. სწორედ ამ ბრძანების შემდეგ მოირგო მან პოლიტიკური სარჩული, – აცხადებს გიორგი მანველიძე.
