დღეიდან აცრა სოფლადაც შესაძლებელია
მარიამ ხითარიშვილი 27 48 93 –
აჭარაში ახალი კორონავირუსის საწინააღმდეგო ვაქცინაციის არეალი კიდევ უფრო გაიზარდა. ადგილობრივი თვითმმართველობების მხარდაჭერით, ხულოს, შუახევის, ქედის, ხელვაჩაურისა და ქობულეთის მუნიციპალიტეტების სოფლებში ამცრელი ბრიგადები თემის საექიმო ამბულატორიებში ვაქცინაციას სისტემატურად ჩაატარებენ. გასვლითი ბრიგადების ვიზიტების მიზანია იმუნიზაციის გეოგრაფიული არეალის გაზრდა, ასევე მოწყვლადი ჯგუფებისთვის სერვისის ხელმისაწვდომობა. წინასწარი ინფორმირების შემდეგ, მოსახლეობას სურვილისამებრ „სინოფარმის“, „სინოვაკისა“ და „ფაიზერის“ ვაქცინით აცრიან. დღეს ვაქცინაციის პროცესს ხულოს მუნიციპალიტეტში აჭარის ჯანმრთელობისა და სოციალური დაცვის მინისტრი, ნინო ნიჟარაძე გაეცნო.
-მსგავსი ვიზიტები გაგრძელდება მომდევნო დღეებშიც. ჩვენთვის განსაკუთრებით პრიორიტეტულია სერვისის მოსახლეობის იმ ნაწილისთვის მიწოდება, რომელიც მოკლებულია ამის შესაძლებლობას ტერიტორიული სიშორის გამო. მომდევნო პერიოდისთვის, ვფიქრობთ, ყველა პირველადი ჯანდაცვის ცენტრი ჩაერთოს ვაქცინაციის პროცესში და მოსახლეობა რომელიც არ არის ბარში დასახლებული, სრულად მოცული იქნას პრევენციის აღნიშნული მეთოდით, – განაცხადა ნინო ნიჟარაძემ.
– ცენტრიდან ძალიან შორს ვცხოვრობ და ვერ ვახერხებდი აცრისთვის გასვლას. მოვიდა სპეციალური ბრიგადა და ადგილზე ავიცერი. თავს ძალიან კარგად ვგრძნობ და მოვუწოდებ ყველას აცრისკენ, – განაცხადა ხიხაძირის თემის მკვიდრმა რუსუდან ხალვაშმა. მუნიციპალიტეტების სოფლებში ხელმძღვანელ პირებთან ერთად ვაქცინაციის პროცესს ასევე გაეცნენ აჭარის ჯანმრთელობისა და სოციალური დაცვის მინისტრის პირველი მოადგილე, რამაზ ჯინჭარაძე, მინისტრის მოადგილე, მარი ზანაქიძე, აჭარის საზოგადოებრივი ჯანდაცვის ცენტრის ხელმძღვანელი, რუსუდან შავიშვილი და დაავადებათა კონტროლისა და საზოგადოებრივი ჯანმრთელობის ეროვნული ცენტრის აჭარის სამმართველოს ხელმძღვანელი ნინო გუგუშვილი. აჭარაში ყოველდღიურად მზარდია ვაქცინაციის მსურველთა რიცხვი. ამჟამად ადმინისტრირებულია 127 850 ვაქცინა.
