11 ოქტომბერი გლოვის დღედ გამოცხადდა
ირმა ცეცხლაძე 27 48 93 –
ბათუმში 26 მაისის ქუჩაზე მომხდარი ტრაგედიის გამო 11 ოქტომბერი ქვეყანაში გლოვის დღედ გამოცხადდა. ამასთან დაკავშირებით განცხადებას პრემიერ-მინისტრი ირაკლი ღარიბაშვილი ავრცელებს:
“ღრმა მწუხარებას გამოვთქვამ ბათუმში მომხდარი ტრაგედიის გამო და ვუსამძიმრებ დაღუპულთა ოჯახის წევრებსა და ახლობლებს. მათთან ერთად ამ საზარელ ტრაგედიას სრულიად საქართველო გლოვობს. ჩემი გადაწყვეტილებით, დაღუპულთა ხსოვნის პატივსაცემად, ორშაბათი, 11 ოქტომბერი გლოვის დღედ გამოცხადდება. სახელმწიფო მომხდარის შედეგად დაზარალებულებს ყველა შესაბამის დახმარებას გაუწევს. კანონის სრული სიმკაცრით დაისჯება ყველა პირი, ვისი ბრალეულობაც გამოიკვეთება. შინაგან საქმეთა სამინისტრომ უკვე დააკავა სამი პირი და გამოძიება გრძელდება”.
ბათუმში, 26 მაისის ქუჩაზე საცხოვრებელი კორპუსი გუშინ, 8 ოქტომბერს ჩამოინგრა. ნანგრევებში მოყოლილი ადამიანების რიცხვი დაზუსტებით ჯერაც არაა ცნობილი, სახელდება სხვადასხვა ციფრი (10-12-16-20). მაშველებმა მომხდარიდან მალევე ამოიყვანეს ნანგრევებში მოყოლილი მცირეწლოვანი, რომელიც კორპუსთან მდგარ ავტომობილში იმყოფებოდა. უშუალოდ შენობაში მყოფი ადამიანებიდან აქამდე მეხანძრე-მაშველებმა ორი ცოცხალი მოქალაქის ამოყვანა შეძლეს, რომლებიც საავადმყოფოში გადაიყავნეს. ერთ-ერთი მათგანი, 35 წლის ინგა მეკეიძე, ექიმების დიდი მცდელობის მიუხედავად (მას ღამის განმავლობაში ოთხჯერ გაუჩერდა გული), ამ დილით, 10 საათზე გარდაიცვალა, რაც შეეხება 37 წლის ზვიად თავდგირიძეს, იგი მთელი დღის განმავლობაში (11 საათი) კონტაქტზე გამოდიოდა მაშველებთან. როგორც მისი ოჯახის წევრები გვატყობინებენ, ბოლო სართულიდან ჩამოვარდნის შემდეგ იგი ნანგრევებში ორ კარადას შორის დარჩენილ სივრცეში მოჰყვა და ამან გადაარჩინა. ახლობლებისვე თქმით, მას სხვა დაზიანებებთან ერთად, ტვინში სისხლის გაჟონვა განუვითარდა, მაგრამ ამჟამად ვითარება სტაბილურია. რეანიმატოლოგ ჯემალ გელაშვილის განმარტებით, დაშავებული მამაკაცის მდგომარეობა მთელი ღამის განმავლობაში მძიმე იყო, თუმცა სიტუაცია ამ ეტაპისთვის კონტროლს ექვემდებარება:
“პაციენტს გუშინ ჩაუტარდა მთელი რიგი ლაბორატორიული ანალიზები. სუნთქვის მწვავე უკმარისობა აქვს, ხანგრძლივი ზეწოლის სინდრომი, დაუზუსტებელი შოკი – ეს არის წინასწარი დიაგნოზი. პაციენტი რეანიმაციულ განყოფილებაში აგრძელებს მკურნალობას. დაგეგმილია მთელი რიგი კვლევები, მკურნალობა. იგი მართვით სუნთქვაზე რჩება.
კლინიკაში შეყვანის შემდეგ პაციენტის მდგომარეობა არ გართულებულა, შეყვანიდან გადავიყვანეთ მართვით სუნქთვაზე. დავიწყეთ მონიტორინგი და შესაბამისად, პაციენტი რეანიმატოლოგების გუნდის მიერ იმართება. მდგომარეობა მძიმეა, თუმცა ამ ეტაპისთვის კონტროლირებადი. მას აღენიშნება მოტეხილობა, მარჯვენა ზედა კიდურის დაჟეჟილობა და მთელ სხეულზე მრავლობითი ექსკორაცია. კლინიკაში შეყვანისას იყო კონტაქტური, თუმცა იყო ადინამიური, გამოხატული იყო ძლიერი საერთო სისუსტე. ამ ეტაპისთვის ის იმყოფება დამცველობითი სამკურნალო ნარკოზის ქვეშ, ამიტომ ის კონტაქტური არ არის“.
ნანგრევებში ნაპოვნია ხუთი ცხედარიც, რომელთაგან ორი ბავშვია. შემთხვევის ადგილზე სამაშველო ოპერაცია მთელი ღამის განმავლობაში მიმდინარეობდა. შს მინისტრ ვახტანგ გომელაურის თქმით, კიდევ სამ ადამიანს ეძებენ.
ტრაგედიასთან დაკავშირებით პასუხისგებაში მიცემული 3 ადამიანიდან ერთი იმ ბინის მეპატრონეა, რომლის დაკვეთით წარმოებული სარემონტო სამუშაოები კორპუსის ნაწილის ჩამონგრევის მიზეზი გახდა. მასთან ერთად დაკავებულია 2 მუშა. ბათუმის მერიის თანამშრომლების დაკითხვა ჯერ არ უწარმოებიათ.
“გამოძიებით დადგინდა, რომ კორპუსის პირველ სართულზე ერთ-ერთი ბინის მფლობელმა ზ.ბ.-მ ბინაში სარემონტო სამუშაოებისთვის ხ.ს. და გ.ს. დაიქირავა. ბინის მესაკუთრის მითითებით და უსაფრთხოების წესების უხეში დარღვევით, საცხოვრებელ ბინაში სამშენებლო-სარემონტო სამუშაოები განხორციელდა, რამაც, სავარაუდოდ, მიმდინარე წლის 8 ოქტომბერს საცხოვრებელი კორპუსის ერთი სადარბაზოს ჩამონგრევა გამოიწვია.
სამშენებლო ან სხვა სამუშაოს წარმოებისას უსაფრთხოების წესის დარღვევის და სხვისი ნივთის დაზიანების ან განადგურების ფაქტებზე, რომელსაც ადამიანის სიცოცხლის მოსპობა და მძიმე შედეგი მოჰყვა, გამოძიება საქართველოს სისხლის სამართლის კოდექსის 240-ე მუხლის მე-2 ნაწილით და 187-ე მუხლის მე-3 ნაწილით მიმდინარეობს”, – ნათქვამია უწყების განცხადებაში. ბრალის დამტკიცების შემთხვევაში, დაკავებულებს 2-დან 10 წლამდე ვადით თავისუფლების აღკვეთა ემუქრებათ.
შინაგან საქმეთა მინისტრმა ვახტანგ გომელაურმა განაცხადა, რომ: “თითოეულ აგურსა და “სინკარზე” მუშაობენ მაშველები, რათა თუ არსებობს იქ ჩამარხულთა შორის ცოცხლად დარჩენილი, გადავარჩინოთ. ხელით მუშაობენ, ფიზიკურად. ამ 3 ადამიანს რომ ვიპოვით, შესაძლოა, გახშირდეს მუშაობის რიტმი. ჩვენი ვარაუდით, გამოძიებით რასაც ვუყურებთ, ნგრევა პირველ სართულზე საყრდენი კედლის გამოღებამ გამოიწვია, დაზუსტებით ვერ გეტყვით”.
საჯარო რეესტრის მონაცემებთან და სამუშაოების ნებართვებთან დაკავშირებით მინისტრმა თქვა, რომ ინფორმაცია არ აქვს, თუმცა “გამოძიება ყველა მიმართულებით მიმდინარეობს”.
“მიშენებები, სამწუხაროდ, 90-იანი წლების პრობლემაა როგორც ბათუმში, ასევე თბილისში. არ ვიცი, მაგას რა უნდა უყოს ხელისუფლებამ. ეს დიდი პრობლემაა არა მარტო ბათუმში, არამედ მთელ ქვეყანაში, საბჭოთა კავშირი რაც დაინგრა, დღემდე არსებულ ყველა ხელისუფლებას უნდა მიეხედა. დაშენებებს არ ვუსვამდი ხაზს, არც ვახსენებდი არც მე, არც თორნიკე რიჟვაძე. ეს არ დაშენებულა არც 5 წლის, არც 6 წლის წინ, ეს დაშენდა 15 წლის წინ ზუსტად ამ კორპუსზე, რაც ჩამოინგრა. ამოიღეთ ნებართვები, როდის არის გაცემული. ნებართვა გაცემულია დაშენებაზე”,- აღნიშნა შს მინისტრმა.
გომელაურმა ასევე თქვა, რომ არ აქვს ინფორმაცია იმის შესახებ, იყო თუ არა სამშენებლო სამუშაოებით გამოწვეული საფრთხის შესახებ სათანადო ორგანოებში შესული ადგილობრივების შეტყობინებები.
აჭარის მთავრობის თავმჯდომარე თორნიკე რიჟვაძის თქმით, 26 მაისის ქუჩაზე სამაშველო ღონისძიებების დასრულების შემდეგ მიმდებარე კორპუსებს გეოლოგები და კონსტრუქტორები შეამოწმებენ.
ჟურნალისტის კითხვის – დაიწყებს თუ არა ბათუმის მერია ტრაგედიის შემდეგ იმ კორპუსების შემოწმებას, სადაც მსგავსი მშენებლობები მიმდინარეობს, პასუხად რიჟვაძემ თქვა, რომ ყველაფერს გამოძიება დაადგენს.
ზემოთ ხსენებული ინგა მეკეიძის გარდაცვალებამდე მაშველებმა ნანგრევებიდან ამოიყვანეს მისი 2 შვილის ცხედარი -1 და 9 წლის ბავშვები, ასევე, მათი ბიძაც, რომელიც ინგა მეკეიძის ახლობლის თქმით, უცხოეთიდან ახალი ჩამოსული იყო და ძმის ოჯახში სტუმრად იმყოფებოდა:
„ჩემი მეზობლები არიან. ბოლო სამი წელი ერთად ვისვენებდით ბახმაროში. საუკეთესო ოჯახი იყო. მშვიდი და სიყვარულით სავსე. მაზლი ახალი ჩამოსული იყო უცხოეთიდან და სტუმრად იყო მათთან. მაშველებს ბიძა ბავშვთან ჩახუტებული ამოუყვანიათ. ოჯახიდან გაადარჩა ინგას მეუღლე და ერთი 5 წლამდე ბავშვი. მამას ბაღში ჰყავდა წაყვანილი და ამან გადაარჩინათ”.
მენაშენეთა ასოციაციის თავმჯდომარე ირაკლი როსტომაშვილის განცხადებით, ბათუმში ჩამონგრეული სადარბაზოს მარჯვნივ მდგომი შენობაც ავარიულია. მისივე თქმით, აღნიშნულ შენობაში მოსახლეობის შეყვანა დაუშვებელია და მისი დემონტაჟი უნდა მოხდეს:
„ერთი კადრიდან ჩანდა, რომ ხელმარჯვნივ შენობას, სპეციალისტი ამას დააკვირდებოდა, ამოღებული ჰქონდა გვერდითი კედლები – მომიჯნავე დანგრეულ სახლთან. რა მიზნით იცით? ყველა შენობაში არის ე.წ. ტემპერატურული ნაკერი, დაახლოებით 30-40 სმ სისქის არის ხოლმე. ამ ტემპერატურული ნაკერის მიერთების მიზნით გვერდითა კედლები ამოღებულია და იყო ბეტონი დასხმული. ეს სახლიც ავარიულია, მთელი პასუხისმგებლობით ვამბობ. მოსახლეობა გამოიყვანეს და იქ არ შეიძლება მოსახლეობის შეყვანა, უნდა მოხდეს იმ სახლის დემონტაჟი“.
შემთხვევის ადგილზე სამაშველო სამუშაოების საწარმოებლად, აჭარის მეზობელი რეგიონებიდან დამატებითი ცოცხალი ძალის მობილიზება მოხდა. რამდენიმე ასეული მაშველის მუშაობა, მონაცვლეობით, შეუჩერებლივ, ამ წუთებშიც გრძელდება. ამ დროისთვის დანამდვილებით არავინ იცის, კიდევ რამდენი ადამიანია ნანგრევებში.
