ხანძარი „ოცნების ქალაქში“
ბათუმში, ე. წ. ოცნების ქალაქის ტერიტორიაზე. ორი საცხოვრებელი სახლი დაიწვა. ჯერჯერობით, ხანძრის გამომწვევი მიზეზი უცნობია. თავდაპირველად ცეცხლი ერთ საცხოვრებელ სახლს გაუჩნდა და მეზობლად მდებარე სახლზე გავრცელდა. თვითმხილველების ინფორმაციით, ადამიანებმა სახლებიდან გამოსვლა დროულად მოახერხეს და არავინ დაშავებულა.
ადგილზე სასწრაფო – სამედიცინო ჯგუფი და სახანძრო-სამაშველო ბრიგადები იყო მობილიზებული.
“ხანძარი ხის სახლებს გაუჩნდა, მიზეზი არ ვიცით. დაიწვა ყველაფერი, ფაქტობრივად, არაფერი დარჩათ. საყოფაცხოვრებო ნივთები განადგურდა. აქ ისედაც გაუსაძლის სიტუაციაში ვცხოვრობთ და წასასვლელი არსად გვაქვს, – აცხადებენ დაზარალებულთა მეზობლები.
შემთხვევის ადგილზე მივიდა აჭარის მთავრობის თავმჯდომარე თორნიკე რიჟვაძე, რომელიც დაზარალებულებს დახმარებას დაპირდა.
„საბედნიეროდ, მსხვერპლი არ გვყავს. ოჯახები დროებით გადაყვანილი იქნებიან შესაბამის უსაფრთხო ადგილას. „ოცნების ქალაქი“ შენდება სწორედ იმიტომ, რომ რისკები და საფრთხის შემცველი გარემო ერთხელ და სამუდამოდ აღმოიფხვრას და ყველა აქ მხოვრებ ოჯახს ჰქონდეს როგორც უსაფრთხო, ასევე ღირსეული საცხოვრებელი პირობები. ის პროექტი, რომელსაც ვაშენებთ, არც ერთი წამით და არც ერთი დღით არ შეჩერებულა. პირველი ფაზა წლის ბოლოსთვის დასრულდება. დაწყებულია მუშაობა მეორე ფაზაზე და ყველა აქ მცხოვრები ოჯახი, რომელიც ამას საჭიროებს, იქნება დაკმაყოფილებული ბოლომდე, ბოლო ოჯახამდე“ – აღნიშნა თორნიკე რიჟვაძემ.
