შეხვედრა მიგრაციის საერთაშორისო ორგანიზაციასთან
მარიამ ხითარიშვილი 27 48 93
აჭარის ჯანმრთელობისა და სოციალური დაცვის მინისტრის მოადგილეები მარი ზანაქიძე და ედუარდ ნაკაშიძე მიგრაციის საერთაშორისო ორგანიზაციის ნიდერლანდების მისიის წარმომადგენლებს შეხვდნენ.
მიგრაციის საერთაშორისო ორგანიზაცია წარმოადგენს გაეროს სააგენტოს და საქართველოში 1993 წლიდან მუშაობს მიგრაციასთან დაკავშირებულ სხვადასხვა პრიორიტეტულ მიმართულებაზე, როგორიცაა ადამიანით ვაჭრობის (ტრეფიკინგის) და საზღვარზე მიგრანტთა უკანონო გადაყვანის წინააღმდეგ ბრძოლა და პრევენცია, მიგრანტების დაცვა და დახმარება, მიგრანტთა ჯანმრთელობის დაცვა, შრომითი მიგრაცია და ადამიანური რესურსის განვითარება.
მიგრაციის საერთაშორისო ორგანიზაცია, ასევე, მხარს უჭერს მიგრაციის პოლიტიკის შემუშავებასა და კვლევას, უზრუნველყოფს მიგრაციასთან დაკავშირებული ყველა სტრუქტურის შესაძლებლობების გაძლიერებას.
შეხვედრის მიზანი იყო ინფორმაციის გაცვლა იმ პროგრამების შესახებ, რომლითაც სარგებლობა ქვეყანაში დაბრუნებულ მოქალაქეებს შეუძლიათ.
მინისტრის მოადგილეებმა საერთაშორისო ორგანიზაციის წარმომადგენლებს აჭარაში მოქმედი სახელმწიფო და ადგილობრივი პროგრამები გააცნეს და მისიის წარმომადგენლობას ქართველი მიგრანტებისათვის გაწეული დახმარებისათვის მადლობა გადაუხადეს.
მიგრაციის საერთაშორისო ორგანიზაცია 174 ქვეყანაში და მათ შორის, საქართველოში მოქმედი მისიების დახმარებით, სამშობლოში ნებაყოფლობითი დაბრუნების პროექტს ახორციელებს, რომლის ფარგლებში საზღვარგარეთ მყოფ რთულ ვითარებაში აღმოჩენილ საქართველოს მოქალაქეებს სამშობლოში დაბრუნებასა და რეინტეგრაციაში ეხმარება.
