საქართველოს ისტორიაში პირველად, 2024 წლის მარტში კურორტ თეთნულდზე ფრირაიდის მსოფლიო ტური ჩატარდება
ეკონომიკისა და მდგრადი განვითარების სამინისტროს ინფორმაციით, საქართველო 6 წამყვან ექსკლუზიურ ქვეყანას შორის დასახელდა (კანადა, ანდორა, ესპანეთი, შვეიცარია, ავსტრია და საქართველო), რომელთაც ფრირაიდის მსოფლიო ტურის ჩატარების უფლება ხვდათ წილად.
ფრირაიდის მსოფლიო ტურში 50 გამორჩეული სპორტსმენი (რაიდერი) იასპარეზებს. შესაბამისად, მესტია გახდა მსოფლიოში ფრირაიდის ახალი მიმართულება, ხოლო კურორტი თეთნულდი ფრირაიდის მოყვარულთათვის ამიერიდან არის ახალი აღმოსაჩენი ადგილი. ამასთან, საქართველო 2024 წელს მსოფლიო ტურიზმის დღის მასპინძელი ქვეყანაა. გაეროს მსოფლიო ტურიზმის ორგანიზაციის წევრმა ევროპულმა ქვეყნებმა, საუდის არაბეთში, ქალაქ რიადში, საქართველოს კანდიდატურას ერთსულოვნად დაუჭირეს მხარი. მსოფლიო ტურიზმის დღის ფარგლებში, ჩვენი ქვეყანა უმასპინძლებს 3000-მდე წამყვან ლიდერს ტურიზმის ინდუსტრიიდან და ავიაციის სექტორიდან. კურორტების განვითარების ფარგლებში, აღსანიშნია აბასთუმნის კურორტის განვითარების პროექტი.
2025 წლისთვის აბასთუმანში გაიხსნება 16 ახალი სასტუმრო, მათ შორის იქნება როგორც ხუთვარსკვლავიანი, საერთაშორისო ბრენდის სასტუმროები, ისე ადგილობრივი, შედარებით დაბალბიუჯეტიანი განთავსების ობიექტები.
კურორტებისა და საკურორტო ადგილების სწორი დაგეგმვის, განვითარებისა და არსებული გამოწვევების შესწავლის მიზნი კურორტების განვითარების სააგენტომ შეისწავლა 200-ზე მეტი კურორტი და საკურორტო ადგილი, რომელიც საქართველოს ყველა რეგიონს მოიცავს.
