რატომ არ ითხოვეს მეზობელი ქვეყნებიდან ვერტმფრენები ღამის ხედვით?
ირაკლი კობახიძე: მეტი ადამიანის გადარჩენა, უბრალოდ, შეუძლებელი იყო
ოპოზიციისა და საზოგადოების ნაწილის განცხადებებს იმის შესახებ, რომ შოვში სტიქიის შემოტევისას, მეტი რესურსის გამოყენების შემთხვევაში, მეტი ადამიანის გადარჩენა იქნებოდა შესაძლებელი, მძიმე სპეკულაცია უწოდა „ქართული ოცნების“ თავმჯდომარე ირაკლი კობახიძემ და განმარტა, რომ დრონების მეშვეობით სრულად შეძლეს იმ ადამიანების დახმარება, რომელთა შველა ტექნიკის და ადამიანის შესაძლებლობის ზღვარს არ სცილდებოდა.
„ღამის ხედვის აპარატურა გამოყენებულ იქნა მყისიერად და შეგახსენებთ, რომ იყო დრონები, რომლებსაც აქვთ იდენტიფიცირების საშუალება, მათ შორის, ადამიანების იდენტიფიცირების საშუალება კონკრეტულ ლოკაციებზე და ასევე, ცხედრების იდენტიფიცირების საშუალება, რაც თავიდანვე იყო გამოყენებული და ამას განმარტავდა შინაგან საქმეთა მინისტრი. არის უამრავი სპეკულაცია იმასთან დაკავშირებით, რომ დამატებითი რესურსის გამოყენების შემთხვევაში, შესაძლებელი იქნებოდა მეტი ადამიანის გადარჩენა, რაც არის, უბრალოდ, ძალიან მძიმე სპეკულაცია. ვისაც უნახავს ადგილზე ლოკაცია, სადაც მოხდა სტიქია და ვინც ადგილზე გაეცნო ვითარებას, ყველა დამეთანხმება, რომ იქ დამატებითი რესურსის გამოყენების შემთხვევაში მეტი ადამიანის გადარჩენა იყო უბრალოდ შეუძლებელი ერთი მარტივი მიზეზის გამო, იყო მყისიერი სტიქია და ღვარცოფის მასა წამოვიდა მყისიერად, ძალიან დიდი სიჩქარით, ამიტომ ვინც, სამწუხაროდ, მოჰყვა ღვარცოფის მასაში, მას არ ჰქონდა გადარჩენის არავითარი შანსი. თავიდანვე, პირველივე საათებში ჰქონდა შსს-ს სამაშველო სამსახურს ყველაფრის ადგილზე ნახვის საშუალება, ყველაფრის იდენტიფიცირების საშუალება და რეალობა იყო, სამწუხაროდ, ასეთი, ვისაც მისწვდა ღვარცოფული მასა, მისი გადარჩენა იყო რეალურად შეუძლებელი და ვისაც არ მისწვდა – მან მოახერხა და თავი დააღწია იმ არეალს. ღამის ხედვის აპარატურით იყო აღჭურვილი დრონები, დრონები იყო ადგილზე, მათი გამოყენებით მუშაობდნენ სამაშველო სამსახურები და თუ რამის პოვნა იყო შესაძლებელი, ყველაფრის რესურსი ჰქონდა რეალურად სამაშველო სამსახურს და დარწმუნებული ვარ, ამაზე საუბრობდა ვახტანგ გომელაური.
როდესაც საუბარია ვერტმფრენებზე ღამის ხედვით, არ იგულისხმება მაინცდამაინც პროჟექტორები. არის სპეციალური აპარატურა დამონტაჟებული ვერტმფრენში, რომელიც იძლევა ობიექტების იდენტიფიცირების საშუალებას. იმავეს გაკეთება შეუძლია დრონს. ვერტმფრენები თავისი ღამის ხედვის აპარატურით მნიშვნელოვანია, როდესაც საჭიროა იდენტიფიცირება და ამ იდენტიფიცირებული ობიექტის გამოყვანა ლოკაციიდან. გამომდინარე იქიდან, რომ ტერიტორია იყო სრულად დათვალიერებული მანამდეც, ბუნებრივია, დრონების საშუალებით ყველა ოპერაციის ჩატარება იყო სრულად შესაძლებელი და ვერტმფრენების ჩართვას არ ჰქონდა დამატებითი რაციონალური საფუძველი. ეს არის რაც განმარტა შინაგან საქმეთა მინისტრმა. რომ ყოფილიყო საჭირო ვერტმფრენები ღამის ხედვის აპარატურით, თუნდაც მეზობელი ქვეყნებიდან შეიძლებოდა მათი მობილიზება, მაგრამ ამის საჭიროება არსებული ვითარების სპეციფიკის გათვალისწინებით უბრალოდ არ არსებობდა“, – განაცხადა კობახიძემ.