გიორგი შარვაშიძის სახელობის პრემიის წლევანდელ ლაურეატებს შორის ჩვენი თანაქალაქელია
ნინო მელია: 27 48 93 –
გიორგი შარვაშიძის სახელობის პრემიის 2020 წლის ლაურეატები ცნობილია. აჭარის მკვიდრთათვის განსაკუთრებით სასიხარულოა, რომ მათ შორისაა ჩვენი თანაქალაქელი, პოეტი შოთა ზოიძე, რომელიც აქამდეც არაერთხელ დაჯილდოებულა ლიტერატურული პრიზებით.
აფხაზეთის ავტონომიური რესპუბლიკის მთავრობის თავმჯდომარესთან არსებული გიორგი შარვაშიძის სახელობის პრემიის კომისიის მიერ გამოვლენილი ამ პრემიის 2020 წლის ლაურეატები გახდნენ: სოხუმის კონსტანტინე გამსახურდიას სახელობის პროფესიული სახელმწიფო დრამატული თეატრი – სპექტაკლისთვის „მთვარის მოტაცება“; ხუტა კვარაცხელია – ფერწერული ტილოებისთვის; ირაკლი შამათავა – მოთხრობების კრებულისთვის – „გამშვები პუნქტი“; შოთა ზოიძე – ლექსების კრებულისთვის – „გულზე დასაყრელი მიწა“.
გიორგი შარვაშიძის სახელობის პრემია ყოველწლიურია და ენიჭება ლიტერატურის, ხელოვნების, პუბლიცისტიკისა და მეცნიერების დარგებში შექმნილ ნაწარმოებს (ნაშრომს), რომელმაც მხატვრულ და სხვა ღირსებათა გამო აღიარება მოიპოვა, განმსჭვალულია თავისუფლების, ჰუმანიზმის, პატრიოტიზმის მაღალი იდეალებით და წარმოადგენს შენაძენს ქართული და აფხაზური ლიტერატურის, ხელოვნების, პუბლიცისტიკისა და მეცნიერების დარგებში.