„თუკი საბოლოოდ უარს იტყვის ოპოზიცია, კანონით დადგენილ ვადებში უფლებამოსილებას შევუწყვეტთ და უმაღლეს საბჭოში დარჩება 15 წევრი‘‘
ირმა ცეცხლაძე 27 48 94 –
მეხუთე მოწვევის აჭარის უმაღლესი საბჭოს ოთხი მოწვევის დეპუტატი დავით ბაციკაძე, რომელმაც თავის დროზე სხვა ოპოზიციურ პარტიებთან ერთად, ბოიკოტი გამოუცხადა მიხეილ სააკაშვილის მმართველ გუნდს საპრეზიდენტო არჩევნების გაყალბების გამო, აცხადებს: „პოლიტიკური ბოიკოტი შეცდომაა, მაშინ ივანიშვილის „ქართული ოცნება“ რომ არ გამოჩენილიყო, მთელი ოპოზიცია მარტივ მამრავლებად დავიშლებოდით და აღარვის გავახსენდებოდით“.
რას ფიქრობს გამოცდილი პოლიტიკოსი მიმდინარე პროცესებზე და რას პროგნოზირებს უმაღლესი საბჭოს ფუნქციონირების კუთხით, ამაზე და სხვა საკითხებზე საუბრობს იგი „აჭარასთან“ ინტერვიუში.
– ბატონო დავით, გილოცავთ, უკვე მეოთხედ გახდით აჭარის უმაღლესი საბჭოს დეპუტატი, ამჯერად, რომელ კომიტეტში ხართ?
-ამჯერად, განათლების, მეცნიერების, კულტურისა და სპორტის კომიტეტს ვუხელმძღვანელებ. ვფიქრობ, მეოთხე მოწვევის უმაღლესი საბჭო უკეთ იფუნქციონირებს და წინა მოწვევების დეპუტაციების საქმეებს გააგრძელებს.
– როგორ შეაფასებთ მიმდინარე პროცესებს, თვლით თუ არა, რომ ოპოზიციის ბოიკოტის გამო პოლიტიკური კრიზისია ქვეყანაში?
-კლასიკური გაგებით, პოლიტიკურ კრიზისად მიიჩნევა სიტუაცია, როდესაც მთავრობას არ ჰყავს უმრავლესობა საკანონდებლო ორგანოში და ვერ გააქვს ბიუჯეტი ან ქვეყნისთვის სხვა სასიცოცხლოდ მნიშვნელოვანი გადაწყვეტილებები. მსგავსი რამ, ჩვენს შემთხვევაში არ არის, ასე რომ არანაირი პოლიტიკური კრიზისი არ გვემუქრება.
– ოპოზიცია სხვას აანონსებს, თვლის, რომ ერთპარტიული პარლამენტი პოლიტიკურ კრიზისს მოასწავებს.
– ეგ არის მათი ერთადერთი მიზანი, სურთ შექმნან ქაოსი, არეულობა, აჟიოტაჟი, რითაც საკუთარ მნიშვნელობას უსვამენ ხაზს.
– მიგაჩნიათ, რომ ერთპარტიული პარლამენტი არ შექმნის პრობლემას საერთაშორისო საზოგადოების თვალში?
– ის, რომ პარლამენტი ერთპარტიულია, ჩვენი ბრალი არ არის, თავიდან ბოლომდე მათი ბრალია, მათი გადაწყვეტილებაა. სამწუხაროა ისიც, რომ თქვენი კოლეგები აყოლილნი არიან „ნაციონალური მოძრაობის“ ტელევიზიების ნარატივს და ამ ფაქტს „ქართული ოცნების“ პრობლემად წარმოაჩენენ. კიდევ ვიმეორებ, ეს არ არის ჩვენი პრობლემა. პასუხი მოსთხოვონ იმ ადამიანებს, ვისაც საზოგადოებამ რაღაც დოზით მხარი დაუჭირა, მისცა ნდობის მანდატები და რომლის გააქტიურებაზეც ახლა უარს ეუბნებიან. მოიგონეს არჩევნების გაყალბება, მაშინ როდესაც ყველა საერთაშორისო სადამკვირვებლო ორგანიზაცია და ჩვენი პარტნიორი ქვეყნების წარმომადგენლები, ასევე, ეუთო, ევროსაბჭო, ევროპარლამენტი, ,,სამართლიანი არჩევნები“ და ა.შ. ამტკიცებს, რომ არჩევნები არ გაყალბებულა. ისინი მოუწოდებენ ოპოზიციას, შევიდნენ პარლამენტსა თუ უმაღლეს საბჭოში, მაგრამ არ შემოდიან, რადგან ეს ეწინააღმდეგება მათი „უფროსის“ მიერ დაკვეთილ სცენარს. გაიხსენეთ ისიც, რას ააყოლეს არჩევნების გაყალბების თემა. იყენებდნენ „სამართლიანი არჩევნების“ მიერ გამოქვეყნებულ ზოგიერთ ბიულეტენს თუმცა ახლა, უკვე, როდესაც „სამართლიანმა არჩევნებმაც“ გამოაცხადა, ხელახალი გადათვლა ზუსტად ემთხვეოდა ცესკოს მონაცემებს და რომ პირიქით, გაბათილებული ბიულეტენების უმეტესობა სწორედ „ქართული ოცნების“ იყო, რაღა დარჩათ თავის სამართლებლად, ვეღარავინ გაიგო.კიდევ 50 წელი რომ დარჩნენ ქართულ პოლიტიკაში, ვეღარასოდეს მიაღწევენ იმ რეზულტატებს, რაც ახლა მიიღეს, რადგან ყველამ იცის, რომ არჩევნები არ გაყალბებულა და ეს მხოლოდ საკანონდებლო ორგანოებში შესვლის ბოიკოტირების საბაბია.
– დაფიქსირდა თუ არა პოლიტიკური ზეწოლა და მუქარა ამომრჩეველზე?
– ერთი ფაქტიც ვერ მოჰყავთ – ვერც დამუქრების და ვერც ზეწოლის, რადგან მსგავსი რამ არ მომხდარა. ორივე ტურზე გამოაქვეყნეს ფალსიფიცირებული ბიულეტენები, სადაც თითქოს საჯარო მოხელეებს უწერიათ, „არ მინდოდა მისვლა, მარამ მაიძულესო“. ატეხეს მთელი ამბავი. შემდეგ სუს-მა გამოიძია ფაქტები და მაშინვე მიჩუმდნენ, რადგან ყველაფერი ეს მათივე დადგმული სპექტაკლი იყო. თან ეს მოხდა შუადღეზე, როდესაც არც იყო დაწყებული ხმის დათვლის პროცედურა. ისიც სათქმელია,რომ მათ საჩივრები შეიტანეს არჩევნების დასრულების, კენჭისყრის შედეგების დათვლის შემდეგ. არჩევნების მსვლელობის პერიოდში კი ერთი შენიშვნაც არ აქვთ დაფიქსირებული, რაიმე დარღვევასა თუ ვინმეს უფლების შელახვაზე. ჩვენთან, უსკო-ში, ერთი საჩივარიც არ შემოსულა. ორი დღის შემდეგ მიაყარეს ცესკოს საჩივრები კარუსელებზე, დისბალანსებზე და დარღვევებზე, რომელიც თურმე მანამდე არ ჩანდა და შემდეგ გამოამჟღავნეს. ეს არის აბსურდი. ვინც ერკვევა საარჩევნო სისტემაში, კარგად იცის, რაც ხდება ამ დროს უბანზე, რომ არავინ გაპატიებს მცირე გადაცდომასაც კი.
– თუ შეიძლება დაგვიკონკრეტოთ, რას გულისხმობთ?
-2008-2010-ის არჩევნებზე, როდესაც მართლაც უსაშველოდ აყალბებდნენ და ატრიალებდნენ როგორც კარუსელებს, ისე ათასგვარ ხრიკებს ყალბი პასპორტებით და მკვდარი სულებით, ოპოზციური პარტიები იქვე, უბნებზე, მაშინვე ვწერდით საჩივრებს, ყველა გადაცდომას მომენტალურად ვაფიქსირებდით, მაგრამ არავინ გვიგდებდა ყურს, არც კი ამჩნევდნენ ჩვენს სამართლიან აღშფოთებას. ათობით საჩივარი შედიოდა მხოლოდ ერთ უბანზე. . . პრინციპში, მათიც მესმის, იმ კაცს ეჩქარება, ბერდება რა. . . რაც უნდა ის ქნან, მაგრამ დაგვანებონ თავი ჩვენც და უკრაინასაც, რა გახდა ასეთი?. .
-„იმ კაცის“ და მისი მიმდევრების ამბავი გასაგებია, მაგრამ ოპოზიციის სხვა წარმომადგენლებს რაში აწყობთ წინა ხელისუფლების სათავეში დაბრუნება და რატომ დარჩნენ მათთან ერთად ბოიკოტის რეჟიმში?
– ვინაა სხვა? ზურა ჯაფარიძე მაშინ მივიდა „ნაციონალებთან“, როდესაც მათი მმართველობა დასრულდა. ვაშაძეც მათი წევრი იყო. პრინციპში „ერთიან ნაციონალურ მოძრაობაში“ მეც კი ვიყავი, მაგრამ 2004 წლიდან წამოვედი ოპოზიციაში. მე იმ ხალხზე ვლაპარაკობ, საფლავში რომ ჩაყვნენ „ნაციონალებს“. ოპოზიციას დღეს წარმოადგენენ სხვადასხვა პარტიებად დაქსაქსული „ნაციონალური მოძრაობის“ წევრები. ესაა მათი სტრატეგია, თითქოს გაბევრდნენ, თუმცა იგივე პოლიტიკას აწარმოებენ და ერთ კაცს ემორჩილებიან განუხრელად.
– იგივეს ხომ ვერ იტყვით რესპუბლიკური პარტიის წარმომადგენლებზე?
– დათო უსუფაშვილსა და ხათუნა სამნიძეზე ნამდვილად მწყდება გული. ამასთან, მიხარია ირაკლი ჩავლეიშვილის უმაღლეს საბჭოში შემოსვლის გადაწყვეტილება, ყველას დაანახა, რომ საკუთარი აზრი აქვს და არ ემორჩილება თავსმოხვეულ აბსურდულ იდეებს.
– თავად რას ფიქრობთ ბოიკოტზე, რომელიც 2008 წელს გამოაცხადეთ გაერთიანებულ ოპოზიციასთან ერთად და არ შეხვედით პარლამენტსა და უმაღლე საბჭოში. მოიტანა რაიმე შედეგეი?
– ამ გადასახედიდან კარგად ჩანს, რომ მაშინ არასწორად მოვიქეცით. ბოიკოტი პოლიტიკაში არ არის გამართლებული სვლა.
– მაშინ რა იყო მიზეზი?
– მაშინაც არჩევნების გაყალბების გამო გამოვაცხადეთ ბოიკოტი, თუმცა დღევანდელი სიტუაციისგან განსხვავებით, გაყალბება რეალური იყო, რასაც ადასტურებდა საერთაშორისო სადამკვირვებლო ორგანიზაციებიც და პარტნიორი ქვეყნების წარმოადგენლებიც.
-ამის მიუხედავად, მაინც თვლით მაშინდელ ბოიკოტს გაუმართლებლად?
– დიახ, ამის მიუხედავად ასე ვთვლი, რადგან 2008 წელს, როდესაც არჩევნები გაყალბდა, საერთაშორისო ორგანიზაციები, რომლებიც გვეთანხმებოდნენ ამ ფაქტში, მაინც მოგვიწოდებდნენ – შედით საკანონმდებლო ორგანოებში და ოფიციალური ტრიბუნა გამოიყენეთ საკუთარი იდეების გასატარებლად და ოპოზიციური ფრთის გასამაგრებლადო. ჩვენ ყურად არ ვიღეთ ეს მოწოდება და რა? რომ არ გამოჩენილიყო ივანიშვილი, საერთოდ ვის გავახსენდებოდით, მარტივ მამრავლებად დავიშლებოდით.
– თქვენი განცხადებით გამოდის, რომ ამჟამინდელი ოპოზიციაც, რომელმაც ანალოგიური სვლა გააკეთა, მარტივ მამრავლებად დაიშლება?
– დიახ, ასე ვფიქრობ, რადგან ახლა არ ჩანს მესამე ძალა, რომელიც მათ ხელს გაუწვდის და რეალურ მხარდაჭერას მოიპოვებს ხალხში. თანაც ახლა ერთი და იგივე პარტიის წევრებია ვითომ გაერთიანებულ ოპოზიციაში, მაშინ კი მართლაც სხვადასხვა იდეების ირგვლივ გაერთიანებული პოლიტიკური ძალა ვიყავით. ასე რომ, არც მაშინ იყო პოლიტიკური ბოიკოტი სიტუაციიდან გამოსავალი და არც ახლაა.
– მაინც რა გამოწვევების წინაშე რჩება ახლა აჭარის უმაღლესი საბჭო,რომლის დეპუტაცია არ არის სრულად დაკომპლექტებული, ლეგიტიმაციის პრობლემა არ შეექმნება? თუკი არ შემოვიდა ოპოზიცია, დარჩენილი ადგილები პოზიციის დეპუტატობის კანდიდატურებით შეივსება?
-ჯერ დაველოდებით, თუკი საბოლოოდ უარს იტყვის ოპოზიცია, კანონით დადგენილ ვადებში უფლებამოსილებას შევუწყვეტთ და უმაღლეს საბჭოში დარჩება 15 წევრი. სხვის ადგილს ვერავინ დაიკავებს.
-ერთპარტიული უმაღლესი საბჭო შეძლებს დაუბრკოლებელ ფუნქციონირებას?
– მარტივად გეტყვით, კანონის ენაზე. უმაღლეს საბჭოს, კანონიერი ფუქნციონირებისთვის, უნდა ჰყავდეს უმრავლესობა – 11 კაცი, რომელიც მიიღებს კანონებს, ბიუჯეტს და ა.შ.ამ შემთხვევაში, ვრჩებით 15 დეპუტატი, 14 – პოზიცია და 1 – ოპოზიცია. ის ერთი წინააღმდეგიც რომ წავიდეს, 14 დეპუტატს მთავრობის არჩევის თუ სხვა საკანონმდებლო ქმედებების შესრულების საშუალება გვაქვს. ასე რომ, საქართველოს პარლამენტისგან განსხვავებით, მეტ ფუფუნებაში აღმოვჩნდით, საკონსტიტუციო უმრავლესობა შევინარჩუნეთ, არავითარი პრობლემა არ ექმნება უმალესი საბჭოს ფუნქციონირებას.
– რაც შეეხება საქართვეელოს პარლამენტს?
– იქ ოპოზიციის წარმომადგენლები თუ არ შევიდნენ, არ ეყოლებათ საკონსტიტუციო უმრავლესობა და. . . ძალიან ცუდად იქცევა „ნაციონალური მოძრაობა“, ეს მილიონჯერ ვთქვი და ისევ გავიმეორებ, მაგრამ მათ რევოლუციური სცენარის განვითარების იმედი აქვთ, ამას ყველა ვხვდებით. ეს ბოიკოტი აწყობს მხოლოდ მათ. ისიც იციან, რომ კანონის ფარგლებში ხელახალი არჩევნები არ დაინიშნება, მაგრამ რიგგარეშე არჩევნები შესაძლოა ჩატარდეს, 5%-იანი ზღვარით. უმრავლესობას 90 დეპუტატით დააკომპლექტებს ისევ „ქართული ოცნება“, ხოლო 60 დეპუტატი ეყოლება მხოლოდ „ნაციონალურ მოძრაობას“. ამისთვის იბრძვიან, რადგან იციან, რომ ხელისუფლებაში უკვე ვერასოდეს მოვლენ, მაგრამ ამ სვლით, ჩახსნიან სხვა პარტიებს და თავად, ერთპიროვნულად იქნებიან ოპოზიციაში. ეს კარგად უნდა ესმოდეს „ლელოსაც“ და სხვა პარტიებსაც.
– თუ არ დაინიშნა ხელახალი არჩევნები, რევოლუციის საფრთხე ხომ არ გვემუქრება?
– დამიჯერეთ, ამ ქვეყანაში რევოლუცია არ იქნება. მაშინაც კი, როდესაც შევარდნაძე ჩამოაგდეს, 8-10 ათასი კაცი შეიკრიბა მხოლოდ. უბრალოდ, ედუარდმა დათმო სავარძელი საააკაშვილის სასარგებლოდ. ახლა კი ვეღარასოდეს შევარდება სააკაშვილი პარლამენტში და ვერც იმ 8 ათას კაცს შეკრებს. რამდენჯერ სცადეს მასშტაბური საპროტესტო აქციის მოწყობა, მაგრამ 4 ათას კაცს ვერ ასცდნენ. არ არის საქართველოში რევოლუციის ასაგორებლად აუცილებელი სამოქალაქო განწყობა. ამისთვის სხვა სიტუაციებია საჭირო. 2012 წელს ხალხი აღდგა მიშას წინააღმდეგ, საკუთარი ღირსების დასაცავად, ახლა კი აღარავინ ზღუდავს არც არავის ღირსებას და არც სიტყვის თავისუფლებას. ასე რომ, არავითარი საფრთხე არ გვემუქრება რევოლუციის კუთხით. სამომავლოდ, იმედია, გამოჩნდება ალტერნატიული ოპოზიციური ძალა, რომელიც „ნაციონალურ მოძრაობას“ დაათმობინებს იმ 27%-ს, ამ არჩევნებში რომ აიღო და უფრო გონიერად განავითარებს დემოკრატიულ პროცესებს ქვეყანაში.