გიგი უგულავა: ჩემთვის „ლელო“ დამთავრდა მაშინ, როცა 4 ოქტომბრის ფარსში გადაწყვიტეს მონაწილეობა

„ნაციონალური მოძრაობის“ წევრი გიგი უგულავა ხაზარაძისა და ბადრი ჯაფარიძის გათავისუფლებას სოციალური ქსელით ეხმაურება. მისი განცხადებით, „ლელო“ დამთავრდა მაშინ, როცა 4 ოქტომბრის ფარსში გადაწყვიტეს მონაწილეობა. ეს უპატიებელი, ისტორიული და ამორალური შეცდომაა“.

„ძალიან და გულწრფელად გამიხარდა მამუკა ხაზარაძისა და ბადრი ჯაფარიძის გათავისუფლება. ან საერთოდ როგორ შეიძლება ადამიანს არ გაგიხარდეს უკანონოდ დაკავებულების გათავისუფლება. ისინი რომ უკანონო, პოლიტიკურ ტყვეობაში იყვნენ, ამაზე საერთოდ არ ვდავობთ, ცხადია, თუ „ქოცი“ არ ხარ. ამიტომ, ამ ნაწილში უსინდისობაა, ადამიანს რაიმე აძახო. მათი დაჭერაც პოლიტიკური აქტი იყო, გამოშვებაც. არც დაჭერას ეკითხებიან პატიმარს და არც გამოსვლას. აქ წერტილი. პოლიტიკურ მხარეს რაც შეეხება, ჩემთვის „ლელო“ დამთავრდა მაშინ, როცა 4 ოქტომბრის ფარსში გადაწყვიტეს მონაწილეობა და ეს არჩევანი მათ დაჭერამდე გააკეთეს.  ეს უპატიებელი, ისტორიული და ამორალური შეცდომაა. ამ შეცდომის შედეგებს, სამწუხაროდ, ქვეყანა და თითოეული ჩვენგანი კიდევ მოვიმკით. სამწუხაროდ, არც იმის მჯერა, რომ უარს იტყვის „ლელო“ 4 ოქტომბრის ბელარუსიზაციის გაფორმებაში მონაწილეობაზე. ძალიან გამიხარდებოდა, მაგრამ არ მჯერა. თავისუფლება რეჟიმის ყველა ტყვეს“, – წერს გიგი უგულავა.