დენის სალუქვაძე ლაბორატორიაში სამუშაო პროცესს გაეცნო
აჭარის სოფლის მეურნეობის მინისტრი დენის სალუქვაძე, მინისტრის მოადგილე ირმა აფხაზავასთან ერთად, სსიპ „ლაბორატორიული კვლევითი ცენტრის“ თანამშრომლებს შეხვდა, ლაბორატორია დაათვალიერა და სამუშაო პროცესს ადგილზე გაეცნო.
როგორც მინისტრმა აღნიშნა, საერთაშორისო სტანდარტის ლაბორატორიული დიაგნოსტიკა სოფლის მეურნეობის განვითარების ერთ-ერთი მნიშვნელოვანი რგოლია.
„ჩემთვის ცნობილია ლაბორატორიული კვლევითი ცენტრის წარმატებები როგორც ქვეყნის, ასევე საერთაშორისო მასშტაბით, აკრედიტებულია საერთაშორისო სტანდარტის შესაბამისად და დღეისათვის საქართველოში ლაბორატორიული გამოკვლევების ყველაზე ფართო სპექტრითაა წარმოდგენილი. ჩვენთვის პრიორიტეტია, რეგიონულ დონეზე მოხდეს ლაბორატორიული სერვისების გაძლიერება, რაც ჯანსაღი პროდუქციის წარმოების აუცილებელი პირობაა“, – განაცხადა დენის სალუქვაძემ.
ლაბორატორია ფლობს ISO 17025 აკრედიტაციას და კვლევებს ახორციელებს საერთაშორისო სტანდარტების სრული დაცვით.