ისრაელმა ღაზა დაბომბა – ბოლო 24 საათში სულ მცირე 123 ადამიანი დაიღუპა

ისრაელის სამხედროებმა ქალაქი ღაზა დაბომბეს. პალესტინის ჯანდაცვის სამინისტროს ცნობით ბოლო 24 საათის განმავლობაში ისრაელის დაბომბვას კიდევ სულ მცირე 123 ადამიანი ემსხვერპლა. ღაზის სექტორის მცხოვრებლების თქმით, ისრაელის ავიაციამ და ტანკებმა ღაზას აღმოსავლეთ რაიონები ინტენსიურად დაბომბეს, რის შედეგადაც ღამით ზეიტუნისა და შეჯაიას უბნებში მრავალი სახლი განადგურდა. ალ-აჰლის საავადმყოფოს ცნობით, მხოლოდ ზეიტუნში, სახლზე საჰაერო თავდასხმის შედეგად, 12 ადამიანი დაიღუპა. ამასთან, პალესტინის ჯანდაცვის სამინისტროს ცნობით, ბოლო 24 საათის განმავლობაში ღაზაში შიმშილობისა და არასრულფასოვანი კვების შედეგად კიდევ რვა ადამიანი, მათ შორის სამი ბავშვი, გარდაიცვალა. ისრაელი ანკლავში არასრულფასოვანი კვებისა და შიმშილის შესახებ პალესტინის ჯანდაცვის სამინისტროს მიერ გავრცელებულ მონაცემებს უარყოფს.