„ლელო-ძლიერი საქართველოს“ ლიდერების საქმე სააპელაციო სასამართლოში გადავიდა

„ლელო-ძლიერი საქართველოს“ ლიდერების მამუკა ხაზარაძისა და ბადრი ჯაფარიძის ადვოკატებმა თბილისის საქალაქო სასამართლოს გადაწყვეტილება უკვე გაასაჩივრეს. როგორც მათი უფლებადამცველი არჩილ ჭავჭანიძე აცხადებს, საჩივარი სააპელაციო სასამართლოში „ფორმალურად“ შევიდა, რათა სტრასბურგის სასამართლოში სარჩელის წარდგენისთვის ყველა ეროვნული მექანიზმი ამოწურული იყოს.
ჭავჭანიძე განმარტავს, რომ საქალაქო სასამართლოს მიერ მილიონ-მილიონი ლარის გირაოს დაკისრება ვერ დაეყრდნო მტკიცებულებებს. მისი თქმით, პროკურატურამ ვერ წარადგინა ვერც ერთი ირიბი მტკიცებულება, რომელიც ხაზარაძისა და ჯაფარიძის საბოტაჟში მონაწილეობის თუნდაც გონივრულ ვარაუდს გაამყარებდა.
„სასამართლომ პრაქტიკულად გააფორმა პოლიტიკური დევნის აქტი. ჩვენ მივმართეთ სააპელაციოს სწორედ იმისთვის, რომ მომავალში სტრასბურგში დავის საფუძველი გვქონდეს, ეს ეხება სამართლიანი სასამართლოს უფლებას,“ – განაცხადა ადვოკატმა.
გამოძიების ე.წ. საბოტაჟის საქმეზე თბილისის საქალაქო სასამართლომ პროკურატურის შუამდგომლობა სრულად დააკმაყოფილა. პარტიის ლიდერებს აღკვეთის ღონისძიების სახით თითო მილიონი ლარის ოდენობის გირაო დაეკისრათ, რომლის გადახდის ვადად 30 დღე განისაზღვრა.