მინისტრი მავნებელთან ბრძოლის ღონისძიებების მიმდინარეობას ადგილზე გაეცნო
აჭარის სოფლის მეურნეობის მინისტრი დენის სალუქვაძე და სურსათის ეროვნული სააგენტოს ფაროსანას საწინააღმდეგო მართვის ცენტრის უფროსი დავით აშორდია მავნებელთან ბრძოლის ღონისძიებების მიმდინარეობას ადგილზე გაეცნენ.
ქობულეთის მუნიციპალიტეტში მობილიზებულია 55 ერთეული სპეციალიზებული ტექნიკა. მავნებლის საწინააღმდეგო წამლობა თერმული ნისლით და ცივი შესხურების მეთოდის გამოყენებით, მუნიციპალიტეტის 14 ადმინისტრაციულ ერთეულში ტარდება.
სურსათის ეროვნული სააგენტო წამლობით ღონისძიებას აჭარის ყველა მუნიციპალიტეტში ახორციელებს. ამ დროისთვის თერმული ნისლით 29 970 ჰექტარი, ხოლო ცივი შესხურებით 3 500-მდე ჰექტარი ფართობია დამუშავებული.
ღონისძიებას აჭარის უმაღლესი საბჭოს დეპუტატი ცოტნე ანანიძე, ქობულეთის მუნიციპალიტეტის მერის მოვალეობის შემსრულებელი ირაკლი ცეცხლაძე და აჭარის სოფლის მეურნეობის სამინისტროს აზიური ფაროსანას წინააღმდეგ გასატარებელი ღონისძიებების ხელშეწყობის სამუშაო ჯგუფის წევრები ესწრებოდნენ.
სასოფლო-სამეურნეო კულტურების დაზიანების მინიმუმამდე შემცირების მიზნით სახელმწიფო შესაბამის ღონისძიებებს ინტენსიურად გააგრძელებს.