ნინო ჩხეტია: ვრჩებით ბოიკოტის რეჟიმში

პარტია „გახარია საქართველოსთვის“ წარმომადგენლები, რომელთა უფლებამოსილება აჭარის ავტონომიური რესპუბლიკის უმაღლესმა საბჭომ 17 ივლისის რიგგარეშე სესიის პლენარულ სხდომაზე ცნო, ბოიკოტის რეჟიმში რჩებიან, – ამის შესახებ გაზეთ „აჭარასთან“ უმაღლესი საბჭოს დეპუტატმა ნინო ჩხეტიამ განაცხადა.

„პარტიის გადაწყვეტილება ძალაშია, ვრჩებით ბოიკოტის რეჟიმში“, – გვითხრა ნინო ჩხეტიამ ჩვენს კითხვაზე, გეგმავენ თუ არა ახალი წევრები საკანონმდებლო ორგანოს მუშაობაში ჩართვას.

შეგახსენებთ, რომ 17 ივლისს, აჭარის ავტონომიური რესპუბლიკის უმაღლესმა საბჭომ ცნო პარტიის „გახარია საქართველოსთვის“ წევრების – ნინო ჩხეტიას და არჩილ სამნიძის უფლებამოსილება. მათ საკანონმდებლო ორგანოში თანაპარტიელები – ირაკლი ბოლქვაძე და გოჩა გუგუნავა ჩაანაცვლეს, რომელთაც სხდომების არასაპატიო მიზეზით გაცდენის გამო, ვადამდე შეუწყდათ სადეპუტატო უფლებამოსილება.