საქართველოს პრეზიდენტი ამერიკაში  გაემგზავრა

საქართველოს პრეზიდენტის ადმინისტრაციის პრესსამსახურის ინფორმაციით,  საქართველოს პრეზიდენტი მიხეილ ყაველაშვილი ამერიკის შეერთებულ შტატებში გაემგზავრა.

მიხეილ ყაველაშვილი ნიუ-იორკში ვიზიტის ფარგლებში გაეროს გენერალური ასამბლეის მე-80 სესიაზე სიტყვით გამოვა.

მათივე ცნობით, აშშ-ში ვიზიტის ფარგლებში დაგეგმილია მაღალი დონის ორმხრივი შეხვედრები. საქართველოს პრეზიდენტი შეხვედრას გამართავს გაეროს გენერალურ მდივანთან ანტონიო გუტერეშთან.

იგი  ასევე დაესწრება ოფიციალურ მიღებას, რომელიც აშშ-ის პრეზიდენტის დონალდ ტრამპისა და მისი მეუღლის მელანია ტრამპის სახელით, გენერალური ასამბლეის მე-80 სესიის მონაწილე დელეგაციათა მეთაურების პატივსაცემად გაიმართება.

პრეზიდენტთან ერთად, ამერიკის შეერთებულ შტატებში ასევე გაემგზავრა საქართველოს საგარეო საქმეთა მინისტრი მაკა ბოჭორიშვილი, რომელიც მიხეილ ყაველაშვილთან ერთად, გაეროს გენერალური ასამბლეის გენერალური დებატების (UNGA) მე-80 სესიაში მიიღებს მონაწილეობას და  მაღალი დონის შეხვედრებს გამართავს კოლეგა მინისტრებთან.

ასევე, დაგეგმილია მაკა ბოჭორიშვილის სიტყვით გამოსვლა სხვადასხვა ფორუმის ფარგლებში.