ფარმაცია – პროფესია, რომელიც მომავალს ქმნის

ბათუმის სამედიცინო აკადემია, სამი ათეული წლის გამოცდილებით, კვლავ რჩება ჯანდაცვის სფეროს კვალიფიციური სპეციალისტების მომზადების ფლაგმანად რეგიონში. მიმდინარეობს რეგისტრაცია საგანმანათლებლო პროგრამებზე, რომელთა შორის განსაკუთრებული ადგილი უჭირავს ფარმაციას — დარგს, რომელიც ჯანდაცვის სისტემის მდგრადობისა და საზოგადოებრივი ჯანმრთელობის ხარისხის გარანტიაა. პროგრამის სტრატეგიულ ხედვასა და უპირატესობებზე მისი ხელმძღვანელი მარინა კვირიკაძე გვესაუბრება
– ქალბატონო მარინა, რა არის ბათუმის სამედიცინო აკადემიის ფარმაციის პროგრამის სტრატეგიული მისია?
– ჩვენი აკადემიის მისიაა, აღზარდოს ჯანდაცვის სფეროს მაღალკვალიფიციური კადრები, რომლებიც სრულად შეესაბამებიან საერთაშორისო სტანდარტებს და პასუხობენ როგორც ადგილობრივი, ისე გლობალური შრომის ბაზრის თანამედროვე მოთხოვნებს. ჩვენი ხედვა სცილდება უბრალოდ ცოდნის გადაცემას; ჩვენი მიზანია, გავხდეთ რეგიონში პროფესიული განათლების წამყვანი ცენტრი, რომელიც ინოვაციური მიდგომებითა და განათლების პოლიტიკაში აქტიური ჩართულობით, ხელს შეუწყობს სამედიცინო სექტორის მდგრად განვითარებას. სტუდენტებში ჩვენ ვავითარებთ პროფესიული პასუხისმგებლობის მაღალ გრძნობას, ეთიკური პრინციპების ერთგულებასა და ხარისხზე ორიენტირებულ აზროვნებას.

– რა ძირითად კონკურენტულ უპირატესობებს გამოყოფდით თქვენს პროგრამაში სხვა პროფესიულ სასწავლებლებთან შედარებით?
– ჩვენი მთავარი უპირატესობა თეორიული ცოდნისა და პრაქტიკული გამოცდილების ღრმა სინთეზშია. პროგრამა გამორჩეულია:
თანამედროვე ინფრასტრუქტურით – აკადემია აღჭურვილია უახლესი ლაბორატორიით, რაც სტუდენტებს საშუალებას აძლევს, პრაქტიკული უნარები რეალურთან მაქსიმალურად მიახლოებულ გარემოში გამოიმუშაონ; მაღალკვალიფიციური აკადემიური პერსონალით – ჩვენი მასწავლებლები დარგის წამყვანი სპეციალისტები არიან, რომლებიც სტუდენტებს უზიარებენ როგორც თეორიულ ცოდნას, ისე პრაქტიკულ გამოცდილებას; პარტნიორებთან მჭიდრო კავშირით – ჩვენ ვთანამშრომლობთ წამყვან ფარმაცევტულ კომპანიებთან და სააფთიაქო ქსელებთან. ასეთი სტრატეგიული პარტნიორობის შედეგად ჩვენი სტუდენტები სწავლის პროცესშივე ეცნობიან რეალურ სამუშაო გარემოს და დამსაქმებლის მოთხოვნებს.
– შეგიძლიათ უფრო დეტალურად აღწეროთ სასწავლო პროცესის სტრუქტურა? როგორ არის დაბალანსებული თეორია და პრაქტიკა?
– პროგრამა „ფარმაცია სააფთიაქო“ ორწლიანია და მისი სტრუქტურა დუალურ მოდელზეა აგებული. თეორიული ნაწილი აკადემიის კედლებში ისწავლება, სადაც სტუდენტები ფუნდამენტურ ცოდნას იღებენ. პარალელურად, პრაქტიკული კომპონენტი ორ მიმართულებად იყოფა: ერთი მხრივ, სტუდენტები მუშაობენ ჩვენს ლაბორატორიაში, სადაც ატარებენ პრაქტიკულ-ლაბორატორიულ სამუშაოებს, ხოლო მეორე მხრივ, გადიან ინტენსიურ პრაქტიკას პარტნიორ სააფთიაქო ქსელებში. ასეთი მიდგომით თეორიული ცოდნა დაუყოვნებლივ მყარდება პრაქტიკული უნარებით.
– რა მექანიზმებს სთავაზობს აკადემია სტუდენტებს კარიერული განვითარებისა და მომავალი დასაქმების ხელშეწყობისთვის?
– აკადემიას აქვს კარიერული მხარდაჭერის კომპლექსური სისტემა, რომელსაც კოორდინაციას უწევს სტუდენტთა და კურსდამთავრებულთა დასაქმებისა და კარიერული განვითარების სპეციალისტი. ჩვენი სერვისები მოიცავს: პერსონალურ კონსულტაციებსა და ტრენინგებს – რეზიუმეს შედგენის, გასაუბრებისთვის მომზადებისა და კარიერული გზის დაგეგმვის საკითხებზე; ვაკანსიების ბანკს, რომელიც სტუდენტებს აწვდის მუდმივად განახლებად ინფორმაციას თავისუფალი სამუშაო ადგილების შესახებ; პროფესიულ ქსელში ჩართულობას – კონფერენციების, გამოფენებისა და დასაქმების ფორუმების მეშვეობით, სადაც მათ ეძლევათ დამსაქმებლებთან პირდაპირი კომუნიკაციის შესაძლებლობა.
– ფარმაცევტული ბაზარი მუდმივად ვითარდება. როგორ უზრუნველყოფს თქვენი პროგრამა, რომ კურსდამთავრებულები მზად იყვნენ ამ დინამიკური გარემოსთვის?
– ჩვენი პროგრამა შეესაბამება საქართველოსა და საერთაშორისო ფარმაცევტული ბაზრის თანამედროვე ტენდენციებს. ამას ვახერხებთ რამდენიმე სტრატეგიული მიმართულებით: სასწავლო გეგმაში მუდმივად ვაინტეგრირებთ ახალი თაობის ფარმაცევტულ ტექნოლოგიებსა და ხარისხის კონტროლის მეთოდებს. ვიყენებთ სწავლების თანამედროვე მეთოდებს, როგორებიცაა ლაბორატორიული სიმულაციები და ელექტრონული პლატფორმები. რაც მთავარია, ვინარჩუნებთ რეგულარულ კომუნიკაციას დამსაქმებლებთან, რათა ჩვენი პროგრამა ყოველთვის პასუხობდეს შრომის ბაზრის რეალურ საჭიროებებს.
– აკადემიური პროცესის მიღმა, რას გვეტყოდით ბათუმის სამედიცინო აკადემიის სტუდენტურ ცხოვრებაზე?
– ჩვენ გვჯერა, რომ სტუდენტის ჰოლისტური განვითარებისთვის აკადემიური გარემო მრავალფეროვანი და საინტერესო უნდა იყოს. ყოველწლიურად ვატარებთ სტუდენტურ პრაქტიკულ კონფერენციებს, სადაც მათ ეძლევათ პრეზენტაციების წარდგენისა და სამეცნიერო დისკუსიაში ჩართვის შესაძლებლობა. ფუნქციონირებს სტუდენტური თეატრალური დასი, ფოტოგრაფიის ექსპრესკურსი, იმართება ექსკურსიები და ინტელექტუალური შეჯიბრებები. ეს ყველაფერი ქმნის ცოცხალ, კრეატიულ და მეგობრულ გარემოს.
– რა არის, თქვენი ხედვით, ფარმაცევტული განათლების სფეროს მთავარი გამოწვევები დღეს და რა სტრატეგიულ პასუხებს სთავაზობს მათ აკადემია?
– ძირითადი გამოწვევებია ტექნოლოგიური პროგრესის სწრაფი ტემპი, დამსაქმებლების მზარდი მოთხოვნა, პრაქტიკულად, მზა კადრებზე და მარეგულირებელი სტანდარტების მუდმივი განახლება. ჩვენი სტრატეგიული პასუხები ამ გამოწვევებზე შემდეგია; საგანმანათლებლო პროგრამების მუდმივი მოდერნიზაცია ბაზრის ტენდენციების შესაბამისად; პრაქტიკული სწავლების კომპონენტის გაძლიერება სიმულაციებისა და რეალურ გარემოში პრაქტიკის გაფართოებით; დამსაქმებლებთან პარტნიორობის გაღრმავება, რათა სასწავლო გეგმები ზუსტად პასუხობდეს მათ მოთხოვნებს.
– რას ურჩევდით აბიტურიენტს, რომელიც ბათუმის სამედიცინო აკადემიის ფარმაციის პროგრამით არის დაინტერესებული?
– მინდა, გაითვალისწინონ, რომ ეს პროფესია მოითხოვს არა მხოლოდ აკადემიურ ცოდნას, არამედ მაღალ შინაგან პასუხისმგებლობას, დეტალებისადმი განსაკუთრებულ ყურადღებას და, რაც მთავარია, უწყვეტი პროფესიული განვითარებისთვის მზადყოფნას. თუ თქვენ გაინტერესებთ მედიცინა, ფარმაცია და გსურთ, თქვენი წვლილი შეიტანოთ საზოგადოებრივი ჯანმრთელობის გაუმჯობესებაში, მაშინ ეს პროფესია თქვენთვისაა.
– დაბოლოს, როგორია ფარმაციის პროგრამაზე რეგისტრაციის პროცედურა?
– ამჟამად მიმდინარეობს საშემოდგომო მიღება. რეგისტრაცია შესაძლებელია 2 სექტემბრიდან 22 სექტემბრის ჩათვლით, მანამდე კი ჩვენს სოციალურ ქსელში გამოქვეყნებულ ბმულზე შეუძლიათ გაიარონ შიდა რეგისტრაცია და ჩვენ დავუკავშირდებით რეგისტრაციის დაწყების პერიოდში. აუცილებელი მოთხოვნებია: პირადობის დამადასტურებელი საბუთი, სრული ზოგადი განათლების ატესტატი და ფოტოსურათი.
აღსანიშნავია, რომ დამატებითი კრიტერიუმები ან ასაკობრივი შეზღუდვები არ არსებობს. წარმატებებს ვუსურვებ ყველა აპლიკანტს!

მარიამ ხითარიშვილი